АҚШ 80 йил ичида биринчи марта Европага 4,7 минг ҳарбийдан иборат «Бақироқ бургутлар» дивизиясини жойлаштирди, улар ҳарбий машғулотларда қатнашади. Бу ҳақда CBS News хабар бермоқда.
Дивизия қўмондони айтишича, низо кучайган ёки НАТОга ҳужум бўлган тақдирда, у Украина ҳудудига киришга тайёр туради.
101-ҳаво-десант дивизияси — 4,7 минг ҳарбийдан иборат енгил пиёдалар гуруҳи бўлиб, у Руминия ҳудудига жойлаштирилган. CBS News уни элита дивизияларидан бири деб атамоқда.
«Биз НАТО ерларининг ҳар бир дюйимини ҳимоя қилишга тайёрмиз… Биз енгил пиёдалар гуруҳимиз, лекин бу ҳаракатчанликни авиация ва ҳаво ҳужумлари учун ҳам қўллай оламиз», — деди дивизия қўмондони ўринбосари Жон Любас.
Оқ уй АҚШ ҳарбийлари Украинадаги низода қатнашмаслигига кўп марта ишонтирган эди.
Август ўрталарида Американинг НАТОдаги вакиллиги АҚШ армиясининг 101-ҳаво-десант дивизияси альянснинг шарқий қаноти ҳимоясини кучайтириш учун Европага жойлаштирилишини айтганди.
НАТО мамлакатлари етакчилари 29 июнь куни Мадриддаги саммитда альянснинг тезкор жавоб кучлари сонини қарийб 8 баробар ошириб, 300 минг кишига етказиш ҳақида келишиб олганди.
Альянс бош котиби Йенс Столтенберг қўшинлар кўпайиши 2023 йилда амалга ошишини маълум қилди. Унинг аниқлик киритишича, альянс мамлакатлари шарқда муайян ҳудудларни мудофаа қилиш учун ушбу кучларни тайёрлайди ва молиялаштиради. НАТО Россия билан чегарага оғир техника ва қурол-яроғ жойлаштиришни режалаштирмоқда.
«Бақироқ бургутлар»
АҚШ армиясининг «Бақироқ бургутлар» 101-ҳаво-десант дивизияси Иккинчи жаҳон урушида Ғарбий Европадаги ҳарбий ҳаракатларда қатнашган. Нормандияга десант туширишда, «Маркет Гарден» операциясида иштирок этган.1965 йилда 101-дивизия бригадаси Вьетнам урушида, 2003 йилда эса Ироққа бостириб киришда қатнашган.
Изоҳ (0)