«Свет»дан узилган Киев ва Украинанинг бошқа шаҳарлари, ҳалигача ертўлада яшаётган лиманликлар. Урушнинг 239-кунидан фоторепортаж
«Укрэнерго» компанияси 10 октябрь кунги оммавий отишма оқибатида шикастланган электр станцияларини таъмирлаш мақсадида бутун мамлакат бўйлаб токни узиш бошланганини эълон қилди. Владимир Зеленский Қрим кўпригидаги теракт буюртмачиси Киев эмаслигини айтди. Харьков вилояти раҳбари Олег Синегубов Украина Қуролли кучлари минтақадаги аҳоли пунктларини озод қилишда давом этаётгани ва ҳозирда вилоят ҳудудининг 1,8 фоизи Россия ишғоли остида қолаётганини таъкидлади. Бундан ташқари, Россия Мудофаа вазирлиги маълумотларига кўра, Украина Қуролли кучлари Херсон, Луганск ва Донецк вилоятларида ҳужум уюштирмоқда.
Владимир Путин ва Сергей Шойгу Рязань вилоятидаги сафарбар қилинганлар ўқитилаётган ўқув марказига ташриф буюрди. Лиз Трасс Буюк Британия бош вазири лавозимидан кетаётганини эълон қилди — Британия Украинани уруш бошланганидан бери энг фаол қўллаб-қувватлаган Ғарб давлатларидан бири. Meduza урушнинг 239-кунига оид асосий фотосуратлар билан бўлишди.
Запорожье вилоятида гуманитар ёрдам тарқатиш
Михайло-Лукашево қишлоғи аҳолиси гуманитар ёрдам тарқатиш пунктида кўнгиллиларга ўз ҳужжатларини кўрсатмоқда. Қишлоқ Запорожьедан 40 километр шарқда жойлашган бўлиб, у Запорожье шаҳри каби Украина Қуролли Кучлари томонидан назорат қилинади.Фото: AP Photo
Михайло-Лукашевода одамлар гуманитар ёрдам қутиларини олмоқда.Фото: AP Photo
Озод қилинган Лимандаги ҳаёт, унинг ёнида ҳамон жанглар давом этмоқда
Лимандаги уйсиз қолган оила — уларнинг квартираси Украина Қуролли кучлари ва босқинчи кучлар ўртасидаги жангларда вайрон бўлган. Украина қўшинлари 1 октябрь куни Донецк вилоятидаги Лиманни озод қилди. Май ойининг охиридан бери шаҳар рус армияси томонидан ишғол қилинган.Фото: Getty Images
Уйининг подвалида фонар ёқиб юрган киши. Лиман аҳолиси ҳали давом этаётган жанглар туфайли ертўлаларда ва бомбапаноҳларда яширинишга мажбур бўлмоқда. Луганск вилояти ҳарбий маъмурияти раҳбари Сергей Гайдайнинг сўзларига кўра, Россия қўшинлари Лиманга янги ҳужум уюштиришга ҳаракат қилмоқда. Унинг таъкидлашича, Россия сафарбар қилинган аскарлари ва «Вагнер» ёлланма жангариларини шаҳарга тортмоқда.Фото: Getty Images
Уйи ертўласида турган қизалоқ. Шаҳар яқинидаги доимий жанглар туфайли қизча деярли бутун вақтини онаси билан ертўлада ўтказади.Фото: Getty Images
Россия президенти Владимир Путин мудофаа вазири Сергей Шойгу ва ҳаво-десант қўшинлари қўмондони ўринбосари Анатолий Концев билан биргаликда Рязань вилоятидаги Ғарбий ҳарбий округда сафарбар қилинганларнинг ўқув марказига ташриф буюрди. Россияда «қисман сафарбарлик» 21 сентябрь куни эълон қилинган эди. Россия Мудофаа вазирлиги 300 мингга яқин одамни сафарбар қилишни режалаштираётганини билдирган. 19 октябрь куни Россия президентининг ҳарбий ҳолат жорий қилиш бўйича фармони имзоланди, унга кўра Украинанинг қўшиб олинган ҳудудларида «тўлиқ», Россиянинг қолган қисмида эса «қисман» ҳарбий ҳолат жорий этилди.Фото: Россия Мудофаа вазирлиги
Украина бўйлаб режалаштирилган электр энергияси узилиши
20 октябрь куни бир неча соатга электр энергиясидан узилган Киевнинг кўриниши. Россиянинг Украина энергетика инфратузилмасига ҳужумлари туфайли расмийлар 20 октябрь куни бутун мамлакат бўйлаб электр энергиясини бир неча соатга узишга қарор қилди. Шу кундан шаҳарларда кўча ёритгичларидан фойдаланиш чекланди. Энергетика инфратузилмасининг шикастланган объектларини таъмирлаш ишлари давом этмоқда.Фото: Anadolu
Киев вилояти, Бородянка қишлоғида яшовчи аёл режали электр таъминоти узилиши мобайнида телефони билан вақт ўтказмоқда. Энергетика вазири маслаҳатчиси Александр Харченконинг сўзларига кўра, Россия ҳужумлари оқибатида Украинанинг бутун энергетика инфратузилмасининг қарийб 40 фоизи жиддий зарар кўрган.Фото: Getty Images
Харьков электр станцияси 10 октябрь куни Россия армияси томонидан кучли ўққа тутилди. Украина расмийларига кўра, мамлакатдаги электр станцияларининг 30 фоиздан ортиғи шикастланган. Эндиликда бу иншоотлар қайта таъмирланиб, фуқароларни электр энергиясини тежашга даъват этилмоқда, энергия тизимини барқарорлаштириш мақсадида мамлакатда электр энергиясини режали ўчириш ишлари олиб борилмоқда.
Изоҳ (0)