Banan narxi keskin oshdi, qovun va guruch arzonlashdi: O‘zbekiston bozorlarida oktabr oyidagi narxlar qanday bo‘lmoqda?

O‘zbekistonda 1—16-oktabr kunlari bozorlarda qishloq xo‘jaligi va go‘sht mahsulotlarining ulgurji narxlari haqida ma’lumot berildi.

Ushbu davr mobaynida bozorda quyidagi mahsulotlar arzonlagan:

• limon 10 ming so‘mga;
• qovun 2,5 ming so‘mga;
• guruch (lazer) 1,5 ming so‘mga;
• guruch (alanga) 750 so‘mga;
• tarvuz 250 so‘mga.

Aynan shu davrda banan 5 ming so‘mga, kartoshka 500 so‘mga oshgan.

Joriy yilning 1—16-oktabr kunlari umumiy qiymati 60,1 mln dollarlik (o‘tgan yilning mos davriga nisbatan 10,4 mln dollar ko‘p) jami 79,7 ming tonna (8,8 ming tonna ko‘p) qishloq xo‘jaligi mahsulotlari eksporti amalga oshirildi.

Mazkur davrda quyidagi mahsulotlar tashqi bozorlarga yetkazib berilgan:

• 26,2 ming tonna uzum;
• 11,9 ming tonna xurmo;
• 7,6 ming tonna piyoz;
• 4,1 ming tonna loviya;
• 3,5 ming tonna mayiz;
• 3,2 ming tonna mosh;
• 2,5 ming tonna turp;
• 2,2 ming tonna qovun;
• 2 ming tonnadan quritilgan meva;
• 1,5 ming tonna anor.

Shuningdek, ushbu davr mobaynida 5,3 mln dollar (o‘tgan yilning mos davriga nisbatan 910 ming dollar ko‘p) qiymatdagi jami 26,9 ming tonna (613 tonna ko‘p) qishloq xo‘jaligi mahsulotlari, xususan, 20,4 ming tonna kartoshka, 1,7 ming tonna banan, 235 tonna mandarin hamda 205 tonna apelsin import qilingan.

“Qo‘yliq” bozoriga 1—16-oktabr kunlari hududlardan jami 13,7 ming tonna, xususan, 6,8 ming tonna kartoshka, 4,9 ming tonna piyoz, 435 tonna karam va 1,5 ming tonna sabzi keltirilgan.

Xususan, hududlar va mahsulotlar kesimida tahlil qilinganda:

• Samarqanddan 1 055 tonna, Toshkent viloyatidan 539 tonna kartoshka;
• Toshkent viloyatidan 2 675 tonna, Jizzaxdan 2 122 tonna va Samarqanddan 178 tonna piyoz;
• Toshkent viloyatidan 345 tonna karam;
• Toshkent viloyatidan 1 066 tonna, Samarqanddan 390 tonna, Farg‘onadan 49 tonna, Qashqadaryodan 14 tonna sabzi yetkazib berilgan.

Shuningdek, “Qo‘yliq” bozoriga Qozog‘istondan 5 023 tonna hamda Qirg‘izistondan 163 tonna kartoshka keltirilgan.

Shu bilan birga, hududlardan “Chorsu” dehqon bozoriga 1—16-oktabr kunlari jami 191,4 tonna, shu jumladan, 171,8 tonna mol go‘shti va 19,6 tonna qo‘y go‘shti keltirib sotilgan.