Marg‘ilonda “Atlas bayrami” xalqaro an’anaviy to‘qimachilik festivali doirasida modalar namoyishi bo‘lib o‘tdi. Bu haqda “Daryo” muxbiri Azizjon Ermatov xabar bermoqda.
Qayd etilishicha, Hunarmandlar markazida ipak va abrli matolardan tayyorlangan milliy va zamonaviy liboslar namoyishi o‘tkazilgan.
Unda Markaziy Osiyo, Yevropa va Tinch okeani mintaqasida faoliyat olib borayotgan yosh va professional dizaynerlar o‘z kolleksiyalari bilan ishtirok etdi.
Namoyish davomida mahalliy hamda xorijlik dizayner va modelyerlar tomonidan kamalakrang xonatlas, ko‘rkam adras, baxmal, nafis shoyi kabi milliy matolarimizdan tayyorlangan turfa uslubdagi betakror liboslar taqdim etildi.
Tomoshabinlar yuksak mahorat bilan tayyorlangan shakli, ranglari, gullari va matolari bilan ajralib turuvchi, bir-birini takrorlamaydigan rang-barang liboslarni ko‘rish va baholash imkoniyatiga ega bo‘ldi.
Aydarxan Kaliyev, Marhamat Umarova, Shoyista Babamirzayeva, Zamira Rashidova, Matluba Ashurova kabi mohir dizaynerlar tomonidan yaratilgan ko‘rkam liboslar o‘ziga xos bichimi, tikilish uslubi, naqshlarining betakrorligi bilan har qanday ayol-qizlar chiroyiga chiroy qo‘shadi.
Liboslar taqdimotini xorijlik hunarmandlar, madaniyat arboblari, mashhur dizaynerlar va soha mutaxassislari kuzatib bordi.
Izoh (0)