Марғилонда «Атлас байрами» халқаро анъанавий тўқимачилик фестивали доирасида модалар намойиши бўлиб ўтди. Бу ҳақда «Дарё» мухбири Азизжон Эрматов хабар бермоқда.
Қайд этилишича, Ҳунармандлар марказида ипак ва абрли матолардан тайёрланган миллий ва замонавий либослар намойиши ўтказилган.
Унда Марказий Осиё, Европа ва Тинч океани минтақасида фаолият олиб бораётган ёш ва профессионал дизайнерлар ўз коллекциялари билан иштирок этди.
Намойиш давомида маҳаллий ҳамда хорижлик дизайнер ва моделерлар томонидан камалакранг хонатлас, кўркам адрас, бахмал, нафис шойи каби миллий матоларимиздан тайёрланган турфа услубдаги бетакрор либослар тақдим этилди.
Томошабинлар юксак маҳорат билан тайёрланган шакли, ранглари, гуллари ва матолари билан ажралиб турувчи, бир-бирини такрорламайдиган ранг-баранг либосларни кўриш ва баҳолаш имкониятига эга бўлди.
Айдархан Калиев, Марҳамат Умарова, Шойиста Бабамирзаева, Замира Рашидова, Матлуба Ашурова каби моҳир дизайнерлар томонидан яратилган кўркам либослар ўзига хос бичими, тикилиш услуби, нақшларининг бетакрорлиги билан ҳар қандай аёл-қизлар чиройига чирой қўшади.
Либослар тақдимотини хорижлик ҳунармандлар, маданият арбоблари, машҳур дизайнерлар ва соҳа мутахассислари кузатиб борди.
Изоҳ (0)