Senatning Xotin-qizlar va gender tenglik masalalari qo‘mitasi BMTTD va Davlat bojxona qo‘mitasi bilan birgalikda xotin-qizlar huquq va imkoniyatlarini kengaytirish hamda davlat muassasalari o‘rtasida gender tenglikni targ‘ib qilish maqsadida “Davlat muassasalari uchun gender tenglikka erishish uchun mukofot” dasturini ishga tushirdi.
Ta’kidlanishicha, O‘zbekistonda amalga oshirilayotgan ushbu dastur Markaziy Osiyodagi ilk bunday dastur hisoblanadi. DM uchun GTEMning asosiy maqsadi davlat siyosatida gender masalalariga ko‘proq e’tibor qaratish va uni samaraliroq yuritish imkonini berishdir. Mukofot davlat muassasalariga o‘z salohiyatini mustahkamlash va gender tenglikni yanada samarali hamda yaqqol ta’minlash uchun chinakam va amaliy poydevor yaratib beradi.
Xususan, Senat raisi, Xotin-qizlarning jamiyatdagi rolini oshirish, gender tenglik va oila masalalari bo‘yicha respublika komissiyasi raisi Tanzila Norboyeva o‘z kirish so‘zida ushbu dasturning amalga oshirilishi davlat tashkilotlari uchun gender masalalaridan xabardorlikni oshirish va O‘zbekistonda gender tenglikni ta’minlash bo‘yicha Milliy strategiyani muvaffaqiyatli amalga oshirishda yangi imkoniyatlarni ochib berishini, shu jumladan davlat organlari va tashkilotlarida xizmat lavozimi ko‘tarilishida xotin-qizlar va erkaklar uchun teng imkoniyatlar yaratishni, ularning salohiyatini oshirishni, shuningdek, ish joyida tazyiq va zo‘ravonlik holatlarining oldi olishni ta’minlaydi.
BMTTDning O‘zbekistondagi vakolatxonasi rahbari Matilda Dimovska ham ushbu dasturning alohida o‘rni haqida to‘xtalar ekan, “Gender tenglikka erishish uchun mukofot” xalqaro sertifikatini olish butun dunyoda davlat muassaslari, ularning gender tenglikka erishish va xotin-qizlarning huquq hamda imkoniyatlarini kengaytirish borasidagi intilishlari va harakatlari e’tirofidir, deb ta’kidladi.
O‘zbekiston Davlat bojxona qo‘mitasi gender tenglik bo‘yicha sertifikat olish xalqaro dasturida ishtirok etish uchun O‘zbekiston tomonidan tanlab olingani qayd etildi. Tadbir davomida Davlat bojxona qo‘mitasi raisining o‘rinbosari Otabek Choriyev idoraning gender tenglikni targ‘ib qilish va xotin-qizlarning huquq hamda imkoniyatlarini kengaytirishga sodiqligini aytib, qo‘mita 2020-yilda “Gender tenglik faoli” milliy tanlovining “Xotin-qizlar huquqlarini himoya qiluvchi eng yaxshi huquqni muhofaza qiluvchi organ” nominatsiyasida g‘olib bo‘lganini va bugungi kunda qo‘mita bu boradagi ishlarni izchil davom ettirayotganini ta’kidladi.
Bundan tashqari, BMTTD ekspertlari tomonidan Bojxona qo‘mitasi butun dunyo bo‘yicha bojxona sohasida Gender tenglikka erishish uchun mukofotni amalga oshiruvchi ilk idora sifatida bojxona hamjamiyatida va davlat boshqaruvining kengroq global sektorida gender tenglik bo‘yicha jahon chempioni bo‘lish uchun imkoniyatga ega ekani ta’kidlandi.
Tadbir so‘ngida ishtirokchilar gender tenglikka erishish bo‘yicha yangi yondashuvlar, g‘oyalar va tashabbuslar yuzasidan fikr almashdi, bir qator davlat idoralari ushbu dasturda ishtirok etishdan va BRMga erishish hamda O‘zbekistonda gender tenglikka erishish milliy strategiyasini amalga oshirishga hissa qo‘shishdan manfaatdor ekanini bildirdi.
Izoh (0)