Farg‘ona viloyati Qo‘qon bojxona postida hujjatlarda 23 tonna 540 kg og‘irlikdagi “Reeksport” sifatida qayd etilgan tovarlarni olib ketayotgan ko‘rsatilgan yuk mashinasi tekshirilganda ichida hech nima yo‘qligi aniqlandi. Bu haqda Davlat bojxona qo‘mitasi xabar qildi.
Qayd etilishicha, 2021-yil sentabr oyida Qo‘qon shahridagi 3 ta MCHJ nomiga xorijdan 23 tonna 540 kilogramm og‘irlikdagi 3 turdagi to‘qimachilik mahsulotlari olib kelingan.
Mazkur tovarlarni bojxonada rasmiylashtirish uchun bojxona yuk deklaratsiyalari “Qo‘qon” tashqi iqtisodiy faoliyat bojxona postiga taqdim qilingan bo‘lib, tovarlar “Bojxona ombori” bojxona rejimiga rasmiylashtiriladi hamda vaqtincha saqlash uchun Qo‘qonsavdo MCHJga qarashli bojxona omboriga topshiriladi.
2022-yil 13-oktabr kuni yuk egalari yuqoridagi tovarlarni “Reeksport” bojxona rejimiga rasmiylashtirib, Tojikistonga olib chiqib ketish uchun bojxona yuk deklaratsiyalarini taqdim etishadi va shu kunning o‘zida Farg‘ona viloyati Bojxona boshqarmasining “Masofaviy elektron deklaratsiyalash” bojxona postida rasmiylashtiruv yakuniga yetkaziladi.
Hujjatlarga binoan ushbu tovarlar ortilgan yuk avtotransport vositasi 2022-yil 15-oktabr kuni Farg‘ona viloyati bojxona boshqarmasining “Andarxon” chegara bojxona posti orqali qo‘shni davlatga chiqib ketayotganida Davlat bojxona qo‘mitasi Shaxsiy xavfsizlik boshqarmasining viloyatdagi tezkor xodimlari tomonidan to‘xtatib qolingan.
Tezkor tadbir davomida yuk avtotransport vositasi haydovchi va xolislar ishtirokida qayta bojxona nazoratidan o‘tkazilganda, yukxonada hujjatlarda ko‘rsatilgan tovarlar umuman yo‘qligi fosh bo‘lgan.
Hozirda “Reeksport” bojxona rejimiga rasmiylashtirilib, amalda chegara bojxona posti orqali olib chiqib ketilmagan umumiy qiymati 2 milliard 188 million so‘mlik tovar moddiy boyliklar vaqtincha saqlovga olinib, belgilangan tartibda protsessual hujjatlar rasmiylashtirilgan.
Holat yuzasidan tergovga qadar tekshiruv harakatlari olib borilmoqda. Xodimlarining mazkur holatga aloqadorligini aniqlash va ularning xatti-harakatlariga huquqiy baho berish maqsadida xizmat tekshiruvi o‘tkazilmoqda.
Izoh (0)