Ижтимоий тармоқларда Тошкент давлат циркига ҳар бир мактабдан 200 нафар бола мажбуран олиб борилаётгани ҳақида хабар тарқалди. Ҳолат шаҳар халқ таълими бош бошқармаси ишчи гуруҳи томонидан ўрганилди.
Қайд этилишича, айни кунларда Россия цирк усталари пойтахтда меҳмон бўлиб турибди. Улар иштирокидаги томошалар ҳафтанинг шанба ҳамда якшанба кунлари соат 15:00 да бошланади.
Ушбу цирк усталарини пойтахтга таклиф этган тадбиркор Ж.Н.нинг билдиришича, ҳар бир томошанинг чипта баҳоси 40 минг сўмдан 100 минг сўмгача қилиб белгиланган.
«Халқимиз цирк томошаларини ўз хоҳишларига кўра катта қизиқиш билан кузатишмоқда. Ҳозирча чипталаримизни мажбурий сотиш ва томошабинларни мажбуран циркка жалб этишимиз учун эҳтиёж йўқ. Хабарда таъкидланганидек, сеанслар кунига уч марта эмас, атиги бир марта намойиш этилмоқда, холос» — деган у ҳолатни изоҳлаб.
Пойтахт мактабларидаги вазият ҳам ўрганилганида юқоридаги хабар ўз асосини топмаган. Ҳеч бир таълим муассасасида бундай ташаббус кузатилмагани аниқланган.
Изоҳ (0)