Boku shahriga tashrif doirasida 19-oktabr kuni muftiy Nuriddin domla Ozarbayjon musulmonlari idorasi raisi, Shayxulislom Ollohshukur Poshozoda bilan uchrashuv o‘tkazdi. Bu haqda O‘zbekiston musulmonlari idorasi matbuot xizmati xabar berdi.
Muloqot chog‘ida Shayxulislom Ollohshukur Poshozoda Muftiy Nuriddin domlaga nufuzli anjumanda qatnashish uchun tashrif buyurganiga minnatdorlik bildirdi.
O‘z navbatida, muftiy ham Kavkaz musulmonlari idorasi raisi, Shayxulislom Poshozodaga xalqaro anjumanga taklif etgani uchun tashakkur aytib, uning yuqori darajada o‘tishiga ishonch bildirdi.
Uchrashuv davomida O‘zbekiston va Ozarbayjon davlat rahbarlarining sa’y-harakatlari, diniy-ma’rifiy sohaga qaratayotgan e’tibori natijasida ko‘plab xayrli ishlar amalga oshirilayotgani, Sharq-u G‘arbni o‘zaro bog‘lagan, buyuk sivilizatsiyalar tutashgan Turkiy xalqlar zaminidan yetishib chiqqan minglab olimlar, mutafakkirlar Islom dini rivojiga juda katta hissa qo‘shgani, ikki davlat diniy idoralari o‘rtasida aloqalarni yanada mustahkamlash har tomonlama zarurligi to‘g‘risida o‘zaro fikr almashildi.
Muloqotda tomonlar ikki mamlakat xalqlari o‘rtasidagi do‘stlik va qardoshlik rishtalarini yanada mustahkamlash, diniy sohadagi hamkorlikni rivojlantirish va o‘zaro tajriba almashish maqsadida hamkorlik qilish to‘g‘risidagi memorandumga imzo chekdi.
Izoh (0)