“Daryo” internet-nashri hamda Toshkent shahri hokimligi qoshidagi Jamoatchilik kengashi hamkorligida tashkil etilgan “Mahalla. Muammo. Mulohaza” loyihasining 3-soni mehmoni adliya vazirining davlat tili masalalari bo‘yicha maslahatchisi, bloger Shahnoza Soatova bo‘ldi. Ko‘rsatuvning bu galgi mavzusi — o‘zbek tilini o‘rganish muammolari.
Ko‘rsatuv mehmonining qayd etishicha, o‘zbek tili yo‘q bo‘lib ketish arafasida turgan tillar qatorida turmaydi, bu tilda 50 million aholi so‘zlashadi. Ammo tilda bu aholining barcha ehtiyojlarini qondirishga yetarli baza yo‘q.
“O‘zbek tili — dunyoda 50 million aholi gaplashadigan til. Yo‘qolib ketmaydi, bunaqa xavf yo‘q, to‘g‘ri.
Lekin “Bu aholi o‘zbek tilida nimani gapiryapti, til ularning qaysi ehtiyojlarini qondiryapti-yu, qaysilarini qondirmayapti?” degan savolni qo‘ysak, umuman boshqacha manzara namoyon bo‘ladi.
Masalan, odamlar maishiy turmushda, kundalik muloqotda ishlatyapti, qorni ochligi, joni og‘riganini shu tilda ifodalay olyapti. Lekin sifatli film ko‘raman desa, yaxshi ilmiy asar o‘qiyman desa, bugun chiqqan yangiliklarni birinchi manbadan ko‘raman desa, adabiyot bo‘yicha Nobel mukofoti olgan yozuvchining asarini o‘qiyman desa, u qaysi tilga murojaat qiladi? O‘zbek tilida bormi ular?
Mana shunday savollarni qo‘yaversak, bizning oldimizda qanchalik katta vazifalar turganini ko‘ra boshlaymiz. Mana bugungi kunda qilishimiz kerak bo‘lgan ishlar.
Ya’ni, o‘zbek tilimiz hozirgi zamon talablariga hozirjavob bo‘lishi kerak. Ko‘proq ehtiyojlarni qondirishi kerak. Odam faqat maishiy hayot bilan yashamaydi. Uning ma’naviy hayoti ham bor, aqliy ehtiyojlari bor. Mana shularni qoniqtiradigan tilga aylantirishimiz kerak.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)