Ўзбекистон ва Қирғизистон ўртасида йўловчи автобуслари ва темир йўл қатновлари тикланиши мумкин. Бу ҳақда Инвестициялар ва ташқи савдо вазири Жамшид Хўжаев ва Қирғизистон Вазирлар Маҳкамаси Раисининг ўринбосари Бахит Торобоев ўртасида бўлиб ўтган учрашувда билдирилган.
Вазирлик матбуот хизматининг қайд этишича, видеоконференция тарзида ўтган учрашувда томонлар транспорт ва логистика соҳасидаги ҳамкорлик соҳасида йўловчи автобуслари ва темир йўл ташишларини қайта тиклаш, икки давлат ўртасидаги авиақатновлар сонини кўпайтириш, шунингдек, Иркештам—Дароот—Қўрғон—Уч-Қўрғон автомобиль йўлини қуриш имкониятлари муҳокама қилинди. Томонлар ушбу йўналишда барча зарур чораларни кўришга тайёр эканликларини билдирди.
Учрашувда саноат кооперациясини ривожлантириш соҳасида қишлоқ хўжалиги техникаси ва автомобиллар, қурилиш материаллари, кальций карбид ишлаб чиқаришни йўлга қўйиш истиқболлари ҳам муҳокама қилинган. Шу нуқтаи назардан, чегараолди ҳудудда Саноат кооперацияси марказини ташкил этиш, тўқимачилик мажмуаси ва қуввати 6,7 МВт бўлган Когарт кичик гидроэлектр станциясини қуриш масалалари ҳам кўриб чиқилди. Томонлар инвестиция келишувлари тўпламини ишлаб чиқишни имкон қадар тезроқ якунлаш бўйича келишувга эришди.
Қишлоқ хўжалиги соҳасида ҳамкорликни кенгайтириш имкониятларини муҳокама қилиб, томонлар биргаликда озиқ-овқат ва уруғлик картошка етиштиришни ташкил этиш, чорвачилик комплексларини яратиш, шунингдек, қишлоқ хўжалиги маҳсулотлари, иссиқхоналар учун ускуналар ва жун маҳсулотлари ишлаб чиқариш учун хом ашё етказиб бериш бўйича ҳамкорликни фаоллаштиришга келишиб олди.
Бишкекда икки томонлама ҳамкорлик бўйича Ўзбекистон—Қирғизистон ҳукуматлараро қўшма комиссиясининг 10-йиғилиши ва бизнес-форумни икки мамлакат минтақалари раҳбарлари иштирокида юқори ташкилий даражада ва мазмун жиҳатидан бойитилган тарзда ўтказиш масалалари ҳам кўриб чиқилган.
Мавзуга доир: Ўзбекистон ва Венгрия инвесторлари ҳамкорликда авиакомпания яратиши мумкин
Изоҳ (0)