Telegram’dagi “Ekologuz” kanalida respublikaning janubiy muhofaza qilingan tabiiy hududlarida jayralarni noqonuniy ovlash amalga oshirilgani aks etgan video e’lon qilingandi. Davlat ekologiya qo‘mitasi matbuot xizmati holat yuzasidan ma’lumot berdi.
Qayd etilishicha, qo‘mita va ichki ishlar organlari xodimlaridan iborat “ekologik patrul” guruhi tomonidan videotasvirda ko‘rsatilgan holat sodir etilgan manzil va fuqarolarning shaxsini aniqlash yuzasidan hozirda o‘rganish ishlari olib borilmoqda.
Eslatib o‘tamiz, O‘zbekiston Respublikasining Ma’muriy javobgarlik to‘g‘risidagi hamda Jinoyat kodekslarida hayvonlarga nisbatan shafqatsiz munosabatda bo‘lganlik uchun javobgarlik chorasi belgilangan. Holat yuzasidan qo‘shimcha ma’lumot berilishini ma’lum qilamiz, — deyiladi xabarda.“Ekologuz”da e’lon qilingan video ostida quyidagicha sharh yozilgan.
O‘zbekistonda yovvoyi hayvonlarning erkin yashashi, tabiatda ularning soni qanchaligi, ko‘payishi va ozuqa manbalari abgor holatda. Kelajak avlodga yovvoyi tabiatni qanday yetkazamiz? Aniq loyiha, ilmiy o‘rganishlar natijasi bormikan?
Kanalimizga kelib tushayotgan murojaatlarda Ekoqo‘mita faqat jarima qo‘llash, pul tushumlari bilan ish yuritishayotgani aytiladi. Buni ekoinspektorlar ham aytishadi: “Afsus, ammo talab qilinayotgan pul tushumini bajarish uchun huquqbuzarlik sodir etilishini poylab turishga majburmiz”. Balki, jonivorlarning o‘ldirilishi, daraxtlarning kesilishini poylab turmay, ularni saqlab qolish choralarini ko‘rish vaqti kelmadimikan?
O‘zbekiston qonunlarida tabiatni muhofaza qilishdan maqsad inson salomatligi ekani ko‘rsatilgan. Kadrlar masalasi-ku, ekologiyada mutlaqo izdan chiqib ketgan. Boshqarma rahbarlari ekolog mutaxassis emas. Yuqoridagi holat bo‘yicha jayra ushlovchilar topiladi, degan umiddamiz, — deyilgan unda.
Izoh (1)
Bla rasmiy javob kutup qolamiz