“Eng faol mahallabay sug‘urta bo‘limi” aksiyasi g‘olibi Misrga boradi

Andijonda “Eng faol mahallabay sug‘urta agenti”, “Eng faol mahallabay sug‘urta bo‘limi” aksiyasi g‘oliblarini taqdirlash tadbiri bo‘lib o‘tdi.

“Yangi O‘zbekistonda el aziz, inson aziz” shiori ostida viloyatdagi bosma va elektron OAV vakillari, axborot xizmatlari rahbarlari, blogerlar ishtirokida “O‘zbekinvest” eksport-import sug‘urta kompaniyasi aksiyadorlik jamiyati Andijon viloyat filiali tomonidan o‘tkazilgan tadbirda mamlakatimizda sug‘urta bozorini rivojlantirish, sug‘urta munosabatlariga aholining keng qatlamlarini jalb etish borasida keng ko‘lamli ishlar olib borilayotgani ta’kidlandi.

- Filial tomonidan aholining sug‘urta madaniyatini yuksaltirish, fuqaro va xonadonlarni turli qaltisliklar hamda baxtsiz hodisalardan sug‘urtalash ishlarini ommalashtirish maqsadida har chorakda aksiya o‘tkazib boriladi, - deydi “O‘zbekinvest” EISK AJ “Sug‘urta agentlari va Mahallabay ishlash” bo‘limi katta menejeri Samidullo Mahmudov. – Aksiya ana shu ishlarni har bir xonadonda, har bir mahallada samarali tashkil etishga, umuman, sug‘urta munosabatlari mazmun-mohiyatini fuqarolarga kengroq tushuntirishga yaqindan yordam bermoqda.

Shuningdek, tadbirda sug‘urta tizimi mutaxassislari tomonidan “Mahallabay ishlash” usulining mazmun-mohiyati, sug‘urta munosabatlariga keng aholi qatlamini jalb etish va sug‘urta bozori iqtisodi sharoitida aholini turli qaltisliklardan ishonchli himoya qilish mexanizmi ekanligi xususida ma’lumotlar berildi.

So‘ngra, aksiya davomida samarali ish olib borib, “Eng faol mahallabay sug‘urta agenti” deb topilgan, sug‘urta agenti Dilnozaxon Sodiqova televizor va 1 million so‘m pul mukofoti, “Eng faol mahallabay sug‘urta bo‘limi” deb topilgan filialning Baliqchi tumani bo‘limi Misr davlatiga ikki kishilik sayohat yo‘llanmasi bilan taqdirlandi.

- Aksiyada g‘olib bo‘lib, Misr davlatiga sayohatga borish yo‘llanmasi bilan taqdirlanganimiz mustaqillik bayrami oldidan bo‘limga haqiqiy bayram tuhfasi bo‘ldi, — deydi “O‘zbekinvest” EISK AJ Andijon viloyat filiali Baliqchi tuman bo‘limi rahbari Feruzaxon Vahobova.

– Olib borgan mehnatimiz samarasi o‘laroq, endi bo‘limimizning ikki nafar eng faol xodimi Misrga sayohatga borish imkoniga ega.

Faoliyatimiz e’tirofi bizni faol bo‘lishga, sug‘urta bozorini rivojlantirish borasida yanada samara bilan ishlashga undaydi.

Reklama huquqi asosida.