Toshkent shahrida bugun, 18-oktabr kuni InnoWeek — 2022 xalqaro innovatsion g‘oyalar haftaligining ochilish marosimi bo‘lib o‘tdi. Ochilish marosimida prezidentning yoshlar, fan, ta’lim, sog‘liqni saqlash, madaniyat va sport masalalari bo‘yicha maslahatchisi Odil Abduraxmonov, Bosh vazirning investitsiyalar va tashqi iqtisodiy masalalari bo‘yicha o‘rinbosari — investitsiyalar va tashqi savdo vaziri Jamshid Xodjayev, Senatning Orolbo‘yi mintaqasini rivojlantirish masalalari va ekologiya qo‘mitasi raisi Boriy Alixanov, Innovatsion rivojlanish vaziri Ibrohim Abdurahmonov, xorijlik hamda mahalliy mehmonlar va ommaviy axborot vositalari ishtirok etdi.
Tadbirda Investitsiyalar va tashqi savdo vaziri Jamshid Xodjayev so‘zga chiqib, yashil innovatsiyalar, shubhasiz, biz duch kelayotgan muammolarni hal qilishda yordam berishini aytdi.
“O‘zbekiston esa shunday amaliyotlarni joriy etishda yetakchilardan hisoblanadi. Va bu yo‘nalishda natijalarni yaxshilash bo‘yicha ishlarni davom ettirmoqdamiz.
Prezidentimiz ta’kidlaganidek, innovatsiyalar – kelajak demakdir. Biz buyuk kelajakni innovatsion g‘oyalar asosida qurishimiz kerak. Innovatsion rivojlanish va raqamli iqtisodiyotga o‘tishimiz muqarrar. O‘zbekistonning innovatsion rivojlanishi va raqamli iqtisodiyotga o‘tish to‘g‘risidagi hujjat qabul qilindi”, — dedi bosh vazir o‘rinbosari.
Innovatsion rivojlanish vaziri Ibrohim Abdurahmonov esa haftalikning bu yilgi shiori “Barqaror rivojlanish uchun yashil innovatsiyalar” sifatida tanlanishi bejizga emasligini alohida qayd etdi.
“Bugungi kunga kelib antropogen omil tufayli ekologiyaga insoniyat tomonidan yetkazilayotgan zarar miqdori kun sayin ortib bormoqda. Tabiiyki, bu jarayonlarning oldini olish va ularning ta’sirini kamaytirish jahon hamjamiyati oldida turgan eng dolzarb vazifalardan biri sanaladi”, — deya qo‘shimcha qildi vazir.
Prezidentning yoshlar, fan, ta’lim, sog‘liqni saqlash, madaniyat va sport masalalari bo‘yicha maslahatchisi Odil Abduraxmonov hamda Senatning Orolbo‘yi mintaqasini rivojlantirish masalalari va ekologiya qo‘mitasi raisi Boriy Alixanov ham tadbirda so‘zga chiqib, yig‘ilganlarni tabrikladi va haftalik ishiga omad tiladi.
Shundan so‘ng ko‘rgazmaga start berilib, uning doirasida O‘zbekiston va xorijiy mamlakatlar vakillari tomonidan yaratilgan va yaratilayotgan innovatsion texnologiyalar, alternativ va energiya tejamkor mahsulotlar, yashil innovatsiyalar taqdim etildi.
InnoWeek — 2022 tadbirlari keng qamrovda davom etmoqda.
Reklama huquqi asosida.
Izoh (0)