8 октябрь куни Hornby битирувчиларининг онлайн конференцияси бўлиб ўтди. Онлайн учрашув дастурнинг Ўзбекистондаги битирувчиларига бағишланди.
Қайд этилишича, ушбу дастур 1961 йилда ташкил этилган бўлиб, инглиз тили ўқитувчилари орасида жуда машҳур. Турли йўналишлар бўйича магистрлик дастурларини тақдим этади:
- бошланғич синф ўқувчиларига дарс бериш;
- ўқитувчиларнинг малакасини ошириш;
- таълимда АКТдан фойдаланиш;
- инглиз тили дарсларида баҳолаш ва бошқалар.
Онлайн учрашувда Жанубий Америка, Африка, Марказий, Жанубий ва Жануби-Шарқий Осиёдан 48 нафар битирувчи иштирок этган.
Ўзбекистонлик Hornby битирувчилари Нодира Исамухамедова, Элянора Менглиева, Эркин Муҳамедов, Наргиза Қўчқорова, Комила Тангирова ва Нилуфар Бегибоева халқаро ҳамкорлар билан биргаликда йирик миллий лойиҳаларда иштирок этиш орқали ислоҳотларнинг асосий жараёнлари ва таркибий қисмлари ҳақида тушунчаларини қандай шакллантиргани ҳақида сўзлаб берган.
Британия Кенгаши уларнинг мутахассис сифатида ривожланишига ёрдам берди ва бу уларга Hornby стипендия дастурини ютиб олиш имконини берди. Ўз навбатида, Буюк Британияда ўқиш давомида олинган билим, кўникма ва малакалар битирувчиларга ўз мамлакатида изланувчан мутахассис бўлиб етишишларига имкон берди. Инглиз тили ўқитувчиларини тайёрлаш ва қайта тайёрлаш тизимини ислоҳ қилиш, бўлажак инглиз тили ўқитувчиларини тайёрлаш тизимини ислоҳ қилиш, турли касб вакиллари учун инглиз тилини ўргатиш дастурларини яратиш, ўқитувчилар учун махсус мақсадли инглиз тили дастурлари (UzTESPING, Netruz) бевосита битирувчилар иштирокида амалга оширилди.
Лойиҳаларда иштирок этиш орқали дастур битирувчилари ўз лойиҳаларини яратишда ёрдам берган етакчилик фазилатларини ривожлантирдилар. Масалан, Нодира Исамухамедова Ўзбекистондаги 8 мингдан ортиқ инглиз тили ўқитувчиларига малака оширишда ёрдам берувчи Меntor Hub ва ELT Uz – English Language Teachers фром Uzbekistan каналларига асос солган. Халқ таълими вазирлиги ҳузуридаги Ўқитувчилар уюшмасини бошқариб келган Наргиза Қўчқорова эндиликда Президент ва ихтисослаштирилган мактабларни ривожлантириш агентлигининг педагог кадрларни танлаш ва малакасини ошириш бошқармасига раҳбарлик қилмоқда. Светлана Хон қатор миллий «Fly High», «Kid’s English» ва «Тееn’s English» инглиз тили дарсликлари муаллифи бўлди.
«British Council мамлакатимизда инглиз тилини ўқитиш сифатини ошириш ва тарғиб қилишда муҳим рол ўйнади. Hornby дастури ва Британия Кенгаши бизга, иштирокчиларга турли лойиҳалар билан ишлаш бўйича барча зарур билим ва тажрибани берди, бунинг натижасида биз мамлакатимизда чет тилини ўрганиш ва ўқитиш тизими ва ёндашувларини ислоҳ қилиш бўйича умумий тушунчага эга бўлдик», - дея ўртоқлашди Hornby дастури битирувчиларидан бири Нодира Исамухамедова.
Hornby таълим фонди А.С. Hornby томонидан 1961 йилда ташкил этилиб, Жамғарманинг асосий вазифаси инглиз тилини ўқитиш ва ўрганишни яхшилашдан иборат бўлиб, стипендия Буюк Британиядан бўлмаган инглиз тили мутахассислари, жумладан, ўқитувчилар, мутахассислар, инспекторлар ва ўқув материаллари муаллифларига берилади. Ҳозирда Уорвик университети томонидан тақдим этилаётган стипендия мутахассисларга TESOL (Теаching English ttо Speakers оf English Languages) бўйича магистр даражасини олиш имкониятини беради.
Грант дастури ўқиш тўловларини (бир йил), яшаш харажатларини, саёҳат ва бошқа харажатларни қоплайди. Номзодлар суҳбат ва IELTS, TOEFL ёки PТЕ халқаро тестлари натижаларига кўра танланади.
Бу тўлиқ стипендия дастури бўлиб, ҳар йили бутун дунё бўйлаб олий маълумотга эга ва стажёр ёки ўқитувчи сифатида тажрибага эга бўлган инглиз тили ўқитувчиларига таклиф этилади. Жамғарма ташкил этилганидан буён бутун дунёдан инглиз тили ўқитувчилари учун 500 дан ортиқ стипендия ажратди.
Изоҳ (0)