Video: “Binokor”da o‘ynagan xokkeychi 40 yil avval sobiq ittifoq vakillarining NHL’dagi debyut goliga muallif bo‘lgandi

Xokkey bo‘yicha Amerika Milliy xokkey ligasida (NHL) Sovet ittifoq vakili Viktor Nechayev roppa-rosa 40 yil oldin o‘ziga xos natija qayd etgandi.

Nechayev 1982-yil 17-oktabr sanasida NHL’da sovet xokkeychilari orasidagi ilk golni urgandi. Viktor haqida ko‘p narsa ma’lum emas. U Amerikaga SSSR Davlat sport qo‘mitasining rasmiy ruxsati bilan bormagan, shunchaki qochib ketgan. Amerikalik ayolga uylanib, “amerika orzusi” tomon ketgan. O‘shanda 3 yil xokkey o‘ynamagan.

Intizom bilan bog‘liq muammolar tufayli “SKA”ni tark etib, O‘zbekistonning “Binokor” va Cherepovetsning “Metallurg” jamoalarida paydo bo‘lgan. AQSHda esa dastlab professional darajada o‘ynagan, u yerda “Los-Anjeles” bosh menejeri Nechayevni payqab qolgan. 1982-yil 17-oktabrda tarixiy voqea sodir bo‘lgan — NHL’dagi ikkinchi o‘yinida Nechayev “Reynjers” darvozasiga shayba kiritgan.

Baxtga qarshi, ertak uzoq davom etmagan. Dastlab Viktor farm-klubga jo‘natilgan, u yerdan esa yanada quyi ligaga o‘tgan. Viktor NHL’da bor-yo‘g‘i 3 ta o‘yinda ishtirok etgan, birinchi gol yagonaligicha qolgan.