Тошкент шаҳрида бугун, 18 октябрь куни InnoWeek — 2022 халқаро инновацион ғоялар ҳафталигининг очилиш маросими бўлиб ўтди. Очилиш маросимида президентнинг ёшлар, фан, таълим, соғлиқни сақлаш, маданият ва спорт масалалари бўйича маслаҳатчиси Одил Абдурахмонов, Бош вазирнинг инвестициялар ва ташқи иқтисодий масалалари бўйича ўринбосари — инвестициялар ва ташқи савдо вазири Жамшид Ходжаев, Сенатнинг Оролбўйи минтақасини ривожлантириш масалалари ва экология қўмитаси раиси Борий Алиханов, Инновацион ривожланиш вазири Иброҳим Абдураҳмонов, хорижлик ҳамда маҳаллий меҳмонлар ва оммавий ахборот воситалари иштирок этди.
Тадбирда Инвестициялар ва ташқи савдо вазири Жамшид Ходжаев сўзга чиқиб, яшил инновациялар, шубҳасиз, биз дуч келаётган муаммоларни ҳал қилишда ёрдам беришини айтди.
«Ўзбекистон эса шундай амалиётларни жорий этишда етакчилардан ҳисобланади. Ва бу йўналишда натижаларни яхшилаш бўйича ишларни давом эттирмоқдамиз.
Президентимиз таъкидлаганидек, инновациялар – келажак демакдир. Биз буюк келажакни инновацион ғоялар асосида қуришимиз керак. Инновацион ривожланиш ва рақамли иқтисодиётга ўтишимиз муқаррар. Ўзбекистоннинг инновацион ривожланиши ва рақамли иқтисодиётга ўтиш тўғрисидаги ҳужжат қабул қилинди», — деди бош вазир ўринбосари.
Инновацион ривожланиш вазири Иброҳим Абдураҳмонов эса ҳафталикнинг бу йилги шиори «Барқарор ривожланиш учун яшил инновациялар» сифатида танланиши бежизга эмаслигини алоҳида қайд этди.
«Бугунги кунга келиб антропоген омил туфайли экологияга инсоният томонидан етказилаётган зарар миқдори кун сайин ортиб бормоқда. Табиийки, бу жараёнларнинг олдини олиш ва уларнинг таъсирини камайтириш жаҳон ҳамжамияти олдида турган энг долзарб вазифалардан бири саналади», — дея қўшимча қилди вазир.
Президентнинг ёшлар, фан, таълим, соғлиқни сақлаш, маданият ва спорт масалалари бўйича маслаҳатчиси Одил Абдурахмонов ҳамда Сенатнинг Оролбўйи минтақасини ривожлантириш масалалари ва экология қўмитаси раиси Борий Алиханов ҳам тадбирда сўзга чиқиб, йиғилганларни табриклади ва ҳафталик ишига омад тилади.
Шундан сўнг кўргазмага старт берилиб, унинг доирасида Ўзбекистон ва хорижий мамлакатлар вакиллари томонидан яратилган ва яратилаётган инновацион технологиялар, альтернатив ва энергия тежамкор маҳсулотлар, яшил инновациялар тақдим этилди.
InnoWeek — 2022 тадбирлари кенг қамровда давом этмоқда.
Реклама ҳуқуқи асосида.
Изоҳ (0)