Dushanba kungi savdolarda Yevropada gaz narxi 1 000 kub metr uchun 1 400 dollardan pastga tushdi. Bu holat iyun oxiridan beri birinchi marta qayd etildi, deya xabar bermoqda Bloomberg.
Niderlandiyadagi TTF markazida noyabr fyucherslari narxi 1 000 kub metr uchun 1 343 dollargacha tushdi. Bu 29-iyundan beri eng past darajadir. Kun boshidan buyon gaz narxining umumiy pasayishi 6,9 foizni tashkil qildi.
Narxlarning pasayishi Yevropa Ittifoqidagi gaz zaxiralarining maksimal darajaga yaqinlashishi, mintaqada nisbatan iliq ob-havo bo‘layotgani va elektr energiyasini ishlab chiqarishda shamol elektr stansiyalarining o‘rtacha ulushi sezilarli darajada oshishi bilan bog‘liq.
Shunday bo‘lsa-da, Ukrainada kuchayib borayotgan urush mamlakat orqali o‘tadigan gaz ta’minotining uzilishi xavfini olib kelishda davom etmoqda.
Ukraina prezidenti apparati rahbari Andrey Yermakning so‘zlariga ko‘ra, dushanba kuni ertalab Kiyev markazida Rossiya kamikadze dronlardan foydalanganidan so‘ng portlashlar sodir bo‘lgan.
Hozircha tranzit oqimlari so‘nggi bir necha oy ichida pastroq darajada bo‘lsa-da, barqarorligicha qolmoqda.
Izoh (0)