Sankt-Peterburgdagi sobiq Nissan zavodi samaradorligini saqlab qolish uchun “KamAZ” orqali Xitoy avtomobil ishlab chiqaruvchisini jalb qilish rejalashtirilmoqda. Bu haqda manbalarga tayanib “Vedomosti” xabar bermoqda.
Ko‘rib chiqilayotgan variantlardan biri — Xitoyning First Automobile Works (FAW) davlat konserni bilan hamkorlik.
“Vedomosti”ning yozishicha, Nissan’ning Rossiyadagi aktivlarini olgan Sanoat va savdo vazirligining Federal davlat unitar korxonasi ishlab chiqarish bo‘yicha hamkorga ega bo‘ladi.
Bu Sankt-Peterburgdagi zavodni boshqaradigan Rossiya kompaniyasi bo‘ladi. Nashr suhbatdoshlaridan biri “KamAZ” bu hamkorga aylanishi mumkinligini, biroq “raqobatchilar ham borligini” aytdi. Yana bir manba ham “KamAZ” tegishli taklif olganini tasdiqlaydi.
“Vedomosti”ning ikkala manbasi ham Nissan zavodini yuklash variantlaridan biri sifatida Xitoyning FAW kompaniyasi bilan hamkorlik muhokama qilinayotganini aytdi.
Muzokaralar qay bosqichda va yana qaysi Xitoy kompaniyalari ko‘rib chiqilayotgani noma’lum. Rossiya Sanoat va savdo vazirligi hozircha bu ma’lumotga izoh bermadi.
11-oktabr kuni Rossiya Sanoat va savdo vazirligining Federal unitar korxonasi Nissan’ning mamlakatdagi aktivlarini sotib olayotganini ma’lum qilgandi.
Nissan Rossiya bozorini tark etishdan ko‘rgan yo‘qotishlari 686 million dollarga baholanmoqda.
Izoh (0)