Sentabr oyining ikkinchi o‘n kunligidan boshlab O‘zbekistonda poliz mahsulotlarining ulgurji narxlari dinamikasida pasayish tendensiyasi shakllandi. Bu haqda EastFruit xabar bermoqda.
So‘nggi bir oy davomida ushbu mahsulotlarning o‘rtacha ulgurji narxi qariyb 2 barobarga pasaydi. Bundan tashqari, ayni paytdagi ulgurji narxlar so‘nggi uch yil ichida ushbu davr uchun eng past ko‘rsatkichda bo‘lmoqda.
2022-yil 9-sentabrdan 14-oktabrgacha bo‘lgan davrda poliz mahsulotlarining o‘rtacha ulgurji narxi 2 500 dan 1 300 so‘m/kg gacha pasaygan.
Bu bir oydan ko‘proq vaqt ichida narxlar 1,9 barobarga tushganini anglatadi. Hozirgi darajalar 2022-yil 15-iyuldan 22-iyulgacha qayd etilgan eng past darajalarga juda yaqin.
Bundan tashqari, 2022-yil 14-oktabr holatiga ko‘ra, qovunning o‘rtacha ulgurji narxi o‘tgan uch yilning shu sanasida qayd etilgan ko‘rsatkichlarga nisbatan eng past ko‘rsatkichdir.
Masalan, qovunning joriy o‘rtacha ulgurji narxi 2021-yilga nisbatan 41 foizga, 2020-yilga nisbatan 24 foizga va 2019-yilga nisbatan 19 foizga arzon.
Tahlilchilar bu yil O‘zbekistondan qovun eksporti rekord darajada bo‘lganini bir necha bor qayd etishgan.
Ayni paytda O‘zbekistondan poliz mahsulotlarini eksport qilish mavsumi faol pallada va ichki bozorda ushbu mahsulotlarning nisbatan past narxlari tashqi bozorlarga poliz mahsulotlarini jo‘natish hajmini yanada oshirishga turtki bo‘lishi mumkin.
Avvalroq O‘zbekistonda anjir eksporti bo‘yicha tarixiy rekord qayd etilgani haqida xabar berilgan edi.
Izoh (0)