Sentabr oyida e‘lon qilingan safarbarlik oqibatidan qo‘rqqan Rossiya fuqarolari mamlakatni tark eta boshladi. Xabarlarga ko‘ra, davlatdan chiqib ketgan fuqarolar soni 1 millionga yaqinlashib qolgan.
O‘zbekistonga ham rossiyaliklarning kirib kelishi ko‘payotgani to‘g‘risida ijtimoiy tarmoqlarda xabarlar tarqalmoqda. Statistika qo‘mitasi ma’lumotlariga ko‘ra, o‘tgan 9 oy mobaynida qariyb 395 ming nafar Rossiya fuqarolari sayohat maqsadida mamlakatga kelgan.
Immigrantlarning O‘zbekistonga “oqib kelishi” aholi turmush tarziga qay darajada ta’sir qilayotgani bilish maqsadida “Daryo” aholi orasida kichik so‘rovnoma o‘tkazdi.
So‘rovnomaning aksariyat ishtirokchilari mazkur holat oqibatida ijara narxlari ko‘tarilib ketganini ta’kidladi.
“Oxirgi paytda ijtimoiy tarmoqlarda kuzatishimizcha, boshqa viloyatlardan Toshkentga kelgan talabalar kvartira masalasi bo‘yicha qiynalyapti. Kvartira egalari talabalarni chiqarib, chet eldan, ya’ni Rossiyadan kelgan fuqarolarni katta narxda ijaraga qo‘yayotganini ko‘rdim. Ular o‘z vatandoshlarini ko‘chaga chiqarib yuboryapti. Eng katta ta’siri shu bo‘ldi deb o‘ylayman”, — deya fikr bildirdi suhbatdoshlardan biri.
Fikr bildirganlarning yana biri esa “Kvartiralarning narxi ko‘tarilib ketadi. Noilojlikdan ular ko‘chada qolib ketishi mumkin”, — deb aytib o‘tdi.
Aksariyat insonlar Rossiya davlati fuqarolarining O‘zbekistonga kirib kelishi hech qanday o‘zgarishlarga olib kelmaydi degan munosabatda.
“Ruslar kelgani bilan bizda hech qanday o‘zgarishlar bo‘lmaydi. Ularning zarari tegmaydi. Biz ruslarning qadriyatlarini o‘rganishimiz mumkin. G‘oya almashish bo‘ladi”, — deydi suhbatdosh.
“Menimcha hech narsani o‘zgartirmaydi. Rossiya tomonidan safarbarlikni qo‘llab-quvvatlayman. Ukrainaga shunday javob berish kerak. Agar Rossiyaga xafv tug‘ilsa, bizga ham xafv tug‘iladi”, — deya javob berdi yana bir fikr bildiruvchi.
Avvalroq “Daryo”da “Harbiy safarbarlik to‘g‘ri yo‘l edimi?” mavzusida kichik so‘rovnoma o‘tkazilgan edi.
Izoh (0)