Сентябрь ойида эълон қилинган сафарбарлик оқибатидан қўрққан Россия фуқаролари мамлакатни тарк эта бошлади. Хабарларга кўра, давлатдан чиқиб кетган фуқаролар сони 1 миллионга яқинлашиб қолган.
Ўзбекистонга ҳам россияликларнинг кириб келиши кўпаётгани тўғрисида ижтимоий тармоқларда хабарлар тарқалмоқда. Статистика қўмитаси маълумотларига кўра, ўтган 9 ой мобайнида қарийб 395 минг нафар Россия фуқаролари саёҳат мақсадида мамлакатга келган.
Иммигрантларнинг Ўзбекистонга «оқиб келиши» аҳоли турмуш тарзига қай даражада таъсир қилаётгани билиш мақсадида «Дарё» аҳоли орасида кичик сўровнома ўтказди.
Сўровноманинг аксарият иштирокчилари мазкур ҳолат оқибатида ижара нархлари кўтарилиб кетганини таъкидлади.
«Охирги пайтда ижтимоий тармоқларда кузатишимизча, бошқа вилоятлардан Тошкентга келган талабалар квартира масаласи бўйича қийналяпти. Квартира эгалари талабаларни чиқариб, чет элдан, яъни Россиядан келган фуқароларни катта нархда ижарага қўяётганини кўрдим. Улар ўз ватандошларини кўчага чиқариб юборяпти. Энг катта таъсири шу бўлди деб ўйлайман», — дея фикр билдирди суҳбатдошлардан бири.
Фикр билдирганларнинг яна бири эса «Квартираларнинг нархи кўтарилиб кетади. Ноиложликдан улар кўчада қолиб кетиши мумкин», — деб айтиб ўтди.
Аксарият инсонлар Россия давлати фуқароларининг Ўзбекистонга кириб келиши ҳеч қандай ўзгаришларга олиб келмайди деган муносабатда.
«Руслар келгани билан бизда ҳеч қандай ўзгаришлар бўлмайди. Уларнинг зарари тегмайди. Биз русларнинг қадриятларини ўрганишимиз мумкин. Ғоя алмашиш бўлади», — дейди суҳбатдош.
«Менимча ҳеч нарсани ўзгартирмайди. Россия томонидан сафарбарликни қўллаб-қувватлайман. Украинага шундай жавоб бериш керак. Агар Россияга хафв туғилса, бизга ҳам хафв туғилади», — дея жавоб берди яна бир фикр билдирувчи.
Аввалроқ «Дарё»да «Ҳарбий сафарбарлик тўғри йўл эдими?» мавзусида кичик сўровнома ўтказилган эди.
Изоҳ (0)