Ekologiya va atrof-muhitni muhofaza qilish davlat qo‘mitasi raisi Alisher Maqsudov lavozimidan ozod etildi
Prezident Shavkat Mirziyoyev raisligida atrof muhitni muhofaza qilish sohasidagi ustuvor vazifalarga bag‘ishlangan videoselektor yig‘ilishi bo‘lib o‘tmoqda. Unda davlat rahbari Ekologiya qo‘mitasi raisi Alisher Maqsudovni lavozimidan ozod etganini ta’kidlab o‘tdi, deya xabar bermoqda “Daryo” muxbiri.
“Bugungi yig‘ilishda atrof muhitni muhofaza qilish sohasidagi ustuvor vazifalarni ko‘rib chiqamiz. Bu yo‘nalishdagi muammolardan barchamiz xabardormiz. Lekin, bunga mas’ul bo‘lgan Ekologiya qo‘mitasi, boshqa idoralar va mahalliy hokimliklarning tashabbus va amaliy ishlari ko‘rinmayapti.
Shu bois men ekologiya qo‘mitasi rahbarini ishdan oldim”, – dedi Prezident.
Ma’lumot uchun, Alisher Maqsudov 1974-yil Toshkent shahrida tug‘ilgan. U 1996-yil Toshkent to‘qimachilik va yengil sanoat instituti hamda 2003-yilda Toshkent davlat iqtisodiyot universitetini bitirgan.
Alisher Maqsudov 2017-yildan 2020-yilga qadar “O‘zpaxtasanoat” AJ boshqaruvi raisi lavozimida faoliyat ko‘rsatgan. 2020-yil 16-noyabrda Ekologiya va atrof-muhitni muhofaza qilish davlat qo‘mitasi raisi etib tayinlangan edi.
Bunda avval Toshkent shahri va Toshkent viloyatining sobiq hokimi Kozim To‘laganov qurilish vazirining o‘rinbosari hamda “O‘ztransgaz” rahbari Ulug‘bek Saidov lavozimidan ozod etilgan edi.
