Ўзбекистонда 2022 йилда 18 мингдан ортиқ жониворни овлашга рухсат берган. Бу ҳақда «Эколог» Telegram-канали хабар қилди.
Унда айтилишича, қўмита раиси Нарзулла Обломуродов 2022 йил 10 майдаги 181-сон буйруқ билан 18 141 дона ёввойи жониворлар ва 8 дона Ўзбекистон «Қизил китоб»ига киритилган камёб ва йўқолиб бораётган ёввойи жониворларни овлашга қаратилган квотага имзо чеккан.
«Жамоатчиликнинг доимий эътирозларига қарамасдан ёввойи ҳайвонларни муҳофаза қиладиган ташкилот томонидан овланишга квота берилаётгани жуда ҳам ачинарли. 2021 йил март ойида Қўмитанинг собиқ раиси Алишер Мақсудов томонидан рухсат этилган ‘Қизил китобъга киритилган қўнғир айиқ воқеасидан қўмита раҳбари сабоқ олмаган кўринади», — деб ёзмоқда канал муаллифи.
Таъкидланишича, 18 141 дона жонивор овлашга квота берилган бўлса-да, амалда бу рақам бир неча баравар ортиқ овланишини кузатиш мумкин.
Ўзбекистонда фаолият олиб бораётган бир гуруҳ эколог ва эковолонтерлар билан, хусусан «Экологуз» жамоаси томонидан ёввойи ҳайвонларни овлашга мораторий жорий этилиши таклифи билдирилган. Аммо мазкур таклиф Экология ва атроф-муҳитни муҳофаза қилиш давлат қўмитаси, Ўрмон хўжалиги давлат қўмитаси, Овчилар уюшмаси, Ов хўжаликлари билан шуғулланадиган ташкилотлар томонидан қўллаб-қувватланмаган.
«Биз мазкур ҳолатни кечирилмас хато деб ҳисоблаймиз. Ёввойи табиатга қилинган шафқатсизлик жамиятга қилинган шафқатсизликдир», — дейилади хабарда.
Изоҳ (0)