O‘zbekistonning beshta tumaniga bugun, 17-oktabr kuni hokimlar tayinlandi. Tumanlarning sobiq hokimlari ma’lum sabablar bilan ishdan olingan. Yangi hokimlarni esa o‘ziga xos bir jihat bog‘lab turadi – ularning barchasi ma’lum sohalarning vazir o‘rinbosaralari lavozimida ish olib borgan.
Jumladan, Sardoba tumani hokimi etib tayinlangan Akmal Mirzayev tayinlovga qadar suv xo‘jaligi vazirining o‘rinbosari lavozimida ishlagan. Azizbek Latifjonov bugun Paxtaobod tumani hokimi lavozimiga tayinlangan bo‘lsa, u bunga qadar favqulodda vaziyatlar vazirining moddiy-texnika va moliya-iqtisodiyot bo‘yicha o‘rinbosari lavozimida ishlagan. Shuningdek, bunga qadar Veterinariya va chorvachilikni rivojlantirish davlat qo‘mitasi raisining o‘rinbosari lavozimida ishlagan Sirojiddin Berdiqulov Nurobod tumani hokimi etib tayinlandi. Bundan tashqari, Davlat xizmatini rivojlantirish agentligi mas’ul xodimi lavozimida ishlagan Hamidullo Inomov Farg‘ona tumani hokimi etib tayinlandi. Monopoliyaga qarshi kurashish qo‘mitasi rais o‘rinbosari lavozimida ishlagan Bekzod Ummatov esa Asaka tumani hokimi etib tayinlandi.
Ro‘yxatda sanalgan beshta tumanning to‘rttasida hokimlar sentabr oyi oxirida ishdan olingandi. Prezident administratsiyasi rahbari tomonidan o‘tkazilgan videoselektor yig‘ilishda ushbu hokimlarning nafaqat ishda kamchilikka yo‘l qo‘ygani, balki ishdan tashqari vaqtda ham turli salbiy holatlarni yuzaga keltirgani aytilgandi.
Jumladan, Andijon tumani sobiq hokimi Abdujabbor Egamberdiyevning hokimlik binosi hovlisida fuqarolar uchun bo‘lib o‘tgan sayyor qabuli keng muhokamalarga sabab bo‘lgandi. Unda hokim ayvon ichida o‘tirib, fuqarolarni esa ayvonda tashqariga o‘tqazib muloqot qilgan. Buni hokimlik ijtimoiy masofa saqlash uchun qilingan, deb izohlagan edi.
Farg‘ona tumani hokimi sobiq Shuhratjon Mo‘minovga nisbatan esa yer sotish bo‘yicha jinoyat ishi qo‘zg‘atilgani haqida aytilgandi. Shuningdek, Asaka tumani sobiq hokimi Mansur Alixonov yer munosabatlarini tartibga solishga oid qonunchilik hujjatlariga rioya etmagani, faoliyatida yo‘l qo‘ygan boshqa jiddiy qonun buzilish holatlari uchun lavozimidan ozod etilgan. Bundan tashqari, Paxtaobod tumani hokimi Elyor Usmonov noqonuniy va lavozimiga mos kelmaydigan xatti-harakatlari sababli ishdan bo‘shatilgandi.
Davlat rahbari 6-oktabr kuni Sirdaryo viloyatiga tashrifi chog‘ida viloyatdagi qator rahbarlar, xususan, bir qator tuman hokimlari ishiga sovuqqonlik bilan yondashgani, mas’uliyatsizlik qilgani sabab ishdan olinishi haqida aytilgandi. Sardoba tumani hokimining ishdan olinishi ham bugun bejizga emas.
Ta’kidlash lozimki, prezident Shavkat Mirziyoyev yil boshida ma’lum sohalarda o‘zini ko‘rsatgan kadrlarni kelgusida tuman va shaharlarga hokim va hokim o‘rinbosari lavozimiga tayinlash bo‘yicha gapirgandi. Bugun o‘z lavozimlariga tayinlangan ushbu hokimlar esa davlat rahbari aytgan va ta’bir joiz bo‘lsa, uzoq muddat davomida sinovdan o‘tgan kadrlar hisoblanadi.
Xo‘sh, endi hududlarda o‘zgarishlar bo‘ladimi? Ushbu hokimlar bundan avvalgi lavozimlarida o‘z sohalari bo‘yicha qator kamchiliklarni bartaraf eta olgan hisoblanadi. Deylik, Sardoba tumani, o‘zi umuman, Sirdaryo viloyati qishloq xo‘jaligi rivojlanayotgan, paxta va boshqa poliz ekinlari borasida yuqori o‘rinlarda turadigan viloyat. Biroq hududda uzoq yillardan buyon ko‘plab muammolar yuzaga kelgan va ularni bartaraf etish zarur. Suv xo‘jaligi vazirligida ishlagan, bo‘lganda ham vazir o‘rinbosari lavozimida ishlagan kadr, albatta, bunday hududda o‘zini ko‘rsatishi zarur.
Yoki bo‘lmasa yuqorida aytib o‘tganimiz, Asaka tumanida yer munosabatlarini tartibga solishga oid qonunchilik hujjatlariga rioya etilmagan. Ushbu tumanga hokim bo‘lgan mas’ul Monopoliyaga qarshi kurashish qo‘mitasida ishlagani, mavjud muammolarni yechishda katta ishni bajara olishiga ishonch bildirildi.
Mamlakatning har bir nuqtasini rivojlantirish borasida ayni o‘sha hudud rahbari, ya’ni hokimning o‘rni katta. Bugungi kunda hokimlar to‘rachilik kayfiyatiga berilmasdan, o‘z ishiga qattiq kirishsa, lavozimini suiiste’mol qilmasdan, faqat va faqat davlat rivoji uchun ishlasa, aholining farovon yashashiga xizmat qilishi mumkin.
Muallif: Og‘abek Samisov
Izoh (0)