Namangan shahridagi “Afsonalar vodiysi” istirohat bog‘ida joriy yil 28—30-oktabr kunlari xalqaro asal festivali bo‘lib o‘tadi. Bu haqda “Daryo” muxbiri Azizbek Abduvaliyev xabar bermoqda.
Viloyatda ilk bor o‘tkazilayotgan mazkur tadbir Turizm va madaniy meros vazirligining Namangandagi hududiy boshqarmasi tomonidan tashkil etilmoqda.
Festival davomida 250 nafardan ortiq mahalliy va xorijiy asalarichilar mahsulotlarini namoyish etishi ko‘zda tutilmoqda. Asal mahsulotlari va asalarichilik, asal yig‘ish va asalari uylari haqida qiziqarli ma’lumotlar taqdim etiladi. Mehmonlar asal mumidan malham ishlab chiqarish, asalarichilikka oid hunarmandlik buyumlari tayyorlash, asalning bir necha navlarini tatib ko‘rish imkoniga ega bo‘ladi.
Tadbir dasturidan sohaga oid ilmiy-amaliy anjuman, asal ko‘rgazmasi, sport musobaqalari, mehmonlar uchun konsert, asalarichilik sohasidagi yetakchi mahalliy va xorijiy mutaxassislarning mahorat darslari o‘rin olgan.
Festival doirasida “Eng yaxshi qadoqlangan asal” va “Eng tabiiy asal” nominatsiyalari bo‘yicha tanlovlar o‘tkazish ham rejalashtirilgan.
Mavzuga doir:
Izoh (0)