“Daryo” nashri 17-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Kiyev yana yoppasiga hujumlarga uchradi. Avvalroq Putin bunga zarurat yo‘qligini aytgandi
17-oktabr, dushanba kuni ertalab Kiyev Rossiyaning kamikadze-dronlari hujumiga uchradi. Dastlabki ma’lumotlarga ko‘ra, muhim infratuzilma obyektlari, shuningdek, turar joy inshootiga zarar yetgan. Butun Ukraina bo‘ylab havo trevogasi e’lon qilindi.
Kiyev meri Vitaliy Klichko dronlar bilan berilgan kamida to‘rtta zarba haqida ma’lum qildi va urib tushirilgan Eronda ishlab chiqarilgan uchuvchisiz qurilmalardan birining bo‘laklari suratini e’lon qildi. “Dronlar bilan hujum oqibatida Kiyevning Shevchenko tumanida noturar joy binosida yong‘in yuzaga keldi. Yong‘in bo‘linmalari ishlamoqda. Bir nechta turar joylarga zarar yetgan. Shifokorlar voqea joylariga yetib borgan. Jabrlanganlar haqidagi ma’lumotlarni aniqlashtirmoqdamiz”, — deb yozdi Klichko.
Ukraina ichki ishlar vaziri maslahatchisi Anton Gerashchenko hujumning maqsadi vokzal yaqinidagi muhim infratuzilma obyektlaridan biri bo‘lganini ma’lum qildi. Shuningdek, u dronlar hujumi davom etayotganini, bir guruh uchar qurilmalar Kiyev viloyatining janubi va sharqida qayd etilganini aytdi. Gerashchenko ko‘p qavatli turar joy binosi zarar ko‘rganini ma’lum qildi.
Havo hujumlari haqida Dnepropetrovsk, Odessa, Nikolayev, Zaporojye va Sumi viloyatlaridan ham xabarlar kelib tushmoqda.
Dronlardan keyin Eron Rossiyaga ballistik raketalar ham yetkazib bermoqchi — WP
Eron Rossiyaga qurol yetkazib berishni kuchaytirmoqda: dronlardan keyin Tehron Ukrainaga zarba berishda qo‘llanilishi mumkin bo‘lgan qisqa masofali ballistik raketalarni ham Moskvaga yashirincha yuborishga rozi bo‘lgan, deb yozmoqda The Washington Post.
Sentabr oyi oxirida Eron Rossiyaga delegatsiya yuborgan, unga qo‘shimcha qurol-yarog‘ bilan ta’minlash shartlarini uzil-kesil kelishib olish vazifasi yuklatilgan, deya ma’lum qildi AQSH ittifoqchilaridan birining razvedka xizmatlari. Ushbu razvedka ma’lumotlari Ukraina va AQSHga ham berilgan.
Razvedka ma’lumotlariga ko‘ra, Fateh-110 va Zolfaghar “yer-yer” raketalarining birinchi partiyasi Rossiyaga yetkazish uchun tayyorlanmoqda. Ular mos ravishda 300 kilometrdan 700 kilometrgacha bo‘lgan masofadagi nishonlarga zarba bera oladi. Bu urush boshlanganidan beri Eron raketalarining Rossiyaga yetkazilishi bo‘yicha birinchi hodisa bo‘ladi.
NATO Yevropada yadroviy o‘quv mashqlarini boshlaydi
NATOning yadroviy tiyib turish bo‘yicha Steadfast Noon (“Mustahkam choshgoh”) rejali o‘quv mashg‘ulotlari bugun, 17-oktabr kuni boshlanib, 30-oktabrga qadar davom etadi, unda 14 ta mamlakat va 60 tagacha harbiy samolyotlar qatnashadi, deb xabar beradi EA Daily. Alyans bayonotiga ko‘ra, mashqlar “Yevropa shimoli-g‘arbi osmonida” — Belgiya va Britaniya havo hududida, shuningdek, Shimoliy dengiz osmonida o‘tkaziladi. Mashg‘ulotlar chog‘ida jangovar quroldan foydalanilmaydi.
Belgiyaning RTBF telekanali xabariga ko‘ra, mashg‘ulotlarda ishtirok etayotgan NATO mamlakatlari harbiy samolyotlarining birortasi ham Rossiya hududiga 1000 kilometrdan ortiq yaqinlashmaydi. Shunga qaramay, Belgiyaning yadro quroliga qarshi koalitsiyasi keskin xalqaro muhitni hisobga olgan holda, mashqlarni bekor qilishni talab etdi.
Yadroga qarshi koalitsiya taxmin qilishicha, Belgiya hududidagi bunday mashg‘ulotlar yadroviy ziddiyat yuzaga kelgan taqdirda, ushbu mamlakatni potensial nishonga aylantiradi,
Moskvada safarbarlik tugagani e’lon qilindi
Moskvada safarbarlik tadbirlari yakunlandi, deya ma’lum qildi shahar meri Sergey Sobyanin. Uning so‘zlariga ko‘ra, safarbarlik punktlari 17-oktabr kuni soat 14:00 da (Toshkent vaqti bilan 16:00) yopiladi.
“Safarbarlik jarayonida yashash joyi va korxonalarga yuborilgan chaqiruv qog‘ozlari o‘z kuchini yo‘qotadi”, — dedi Moskva meri. Sobyaninning aytishicha, safarbarlikning barcha vazifalari “to‘liq bajarilgan”.
14-oktabr kuni Rossiya prezidenti Vladimir Putin safarbarlik tadbirlari ikki hafta ichida yakunlanishini ma’lum qilgan edi.
Ayni vaziyatda Rossiyada senator va deputatlar uchun safarbarlikka chaqirish muddatini ortga surishni bekor qilish taklif etildi. Bundan tashqari, qonun loyihasida “Rosgvardiya”, FVV, FXXda harbiy xizmat o‘tayotgan xodimlarni birinchi o‘rinda safarbarlikka jalb qilinadigan fuqarolar qatoriga qo‘shish taklif qilinmoqda.
Toshkentda tez yordam xodimlari yana kaltaklandi
Toshkentning Mirobod tumanida tez yordam xodimlari kaltaklanganiga doir xabarlar tarqaldi. Sog‘liqni saqlash vazirligi mazkur holat yuzasidan ma’lumot berdi.
Tez yordam xodimlari manzilga kelganida ko‘chada bemorligi aytilgan 22 yoshli fuqaro M.A. noadekvat holatda yon-atrofdagi kishilarga tajovuz qilayotgani ma’lum bo‘lgan. 103 ko‘chma brigadasi unga birinchi tibbiy yordam ko‘rsatmoqchi bo‘lganda mushtumzo‘r fuqaro shifokorlarga kuch ishlatib, tez yordam mashinasiga ham jiddiy zarar yetkazgan.
Voqea jiddiy tus olayotganini ko‘rgan tez tibbiy yordam xodimlari darhol tuman ichki ishlar bo‘limiga murojaat qilgan. Huquqni muhofaza qiluvchi organ xodimlari yetib kelguniga qadar fuqaro M.A. 103 brigadasi haydovchisi I.H.ni kaltaklab, unga jarohat yetkazgan.
Izoh (0)