Dehqonobodda mingdan ortiq aholini uyli qilishi ko‘zda tutilgan Dehqonobod siti qurilishi boshlab yuborildi (foto)

Qashqadaryo viloyatining Dehqonobod tumanida mingdan ortiq aholini uyli qilishi ko‘zda tutilgan Dehqonobod City ko‘p qavatli uylar majmuasi qurilishi boshlab yuborildi. Bu haqda “Daryo”ga tuman hokimligi axborot xizmati xabar berdi.

Ma’lum qilinishicha, majmua ochilishida ishtirok etgan viloyat hokimi Murodjon Azimov, tuman hokimi Zoir Aliqulov va sektorlar rahbarlari, shuningdek nuroniylar, keng jamoatchilik va OAV vakillari yangi uylar qurilishining ilk peydovorini qo‘ygan.

Asli dehqonobodlik bo‘lgan va ayni kunda Toshkentda faoliyat yurituvchi tadbirkor Tohir Saidov rahbarligidagi “Sof mad build” MCHJ tomonidan barpo qilinishi rejalashtirilgan majmua 8 gektar maydonda barpo etiladi. Majmuada 1034 nafar aholiga mo‘ljallangan 6 ta 5 qavatli turar joy binolari quriladi, — deydi tuman hokimi Zoir Aliqulov.

Tuman hokimining qo‘shimcha qilishicha, majmua yonida 500 ta ish o‘rni yaratuvchi tikuv fabrikasi ham qurilmoqda.

Ushbu ko‘p qavatli turar joy binolari aholi uchun arzon narxlarda beriladi. Loyihani muhtaram prezidentimiz Shavkat Mirziyoyevning shaxsan o‘zlari qo‘llamoqda. Qolaversa aynan shu hududda 500 ta yangi ish o‘rni yaratuvchi tikuv fabrikasi ham qurilmoqda, — deydi tuman hokimi Zoir Aliqulov.