Бугун, 17 октябрь куни Халқ депутатлари Фарғона тумани кенгашининг навбатдан ташқари сессияси бўлиб ўтди, деб хабар бермоқда «Дарё» мухбири Азизжон Эрматов.
Сессияда ташкилий масала кўрилиб, Иномов Ҳамидулло Тожиевич Фарғона тумани ҳокими лавозимига тасдиқланган.
Маълум қилинишича, сессия ишида вилоят ҳокими Хайрулла Бозоров, туман кенгаши депутатлари, ҳоким ўринбосарлари, секторлар, бошқарма ва ташкилот раҳбарлари, маҳалла раислари, жамоатчилик фаоллари, ОАВ вакиллари иштирок этган.
Сессияда Хайрулла Бозоров шу кунга қадар Ўзбекистон Республикаси Президенти ҳузуридаги Давлат хизматини ривожлантириш агентлиги Кадрлар маъмуриятчилиги департаменти давлат органлари ва ташкилотларида кадрлар ишини мувофиқлаштириш бошқармаси бош инспектори вазифасида ишлаб келган Ҳамидулла Иномов номзодини туман ҳокими лавозимига тавсия қилган.
Тавсия этилган номзод туман кенгаши депутатлари томонидан бир овоздан қўллаб-қувватланган.
Маълумот учун, Ҳамидулло Иномов 1982 йилда Фарғона вилояти Бувайда туманида туғилган. Аввалроқ Президент администрацияси раҳбари Сардор Умурзоқов бошчилигида 27 сентябрь куни бўлиб ўтган видеоселектор йиғилишда Фарғона тумани ҳокими Шуҳратжон Мўминов ишдан олингани ҳақида хабар берилган эди.
Шунингдек, Сирдарё вилоятининг Сардоба туманига ҳам янги ҳоким тайинланди. Айни кунга қадар Ўзбекистон Республикаси сув хўжалиги вазири ўринбосари лавозимида ишлаб келган Акмал Арзиев собиқ ҳоким Абдуазим Хидиров ўрнида Сардоба тумани ҳокими сифатида иш бошлаган.
Изоҳ (0)