17-oktabr, dushanba kuni ertalab Kiyev Rossiyaning kamikadze-dronlari hujumiga uchradi. Dastlabki ma’lumotlarga ko‘ra, muhim infratuzilma obyektlari, shuningdek, turar joy inshootiga zarar yetgan. Butun Ukraina bo‘ylab havo trevogasi e’lon qilindi.
Kiyev meri Vitaliy Klichko dronlar bilan berilgan kamida to‘rtta zarba haqida ma’lum qildi va urib tushirilgan Eronda ishlab chiqarilgan uchuvchisiz qurilmalardan birining bo‘laklari suratini e’lon qildi. “Dronlar bilan hujum oqibatida Kiyevning Shevchenko tumanida noturar joy binosida yong‘in yuzaga keldi. Yong‘in bo‘linmalari ishlamoqda. Bir nechta turar joylarga zarar yetgan. Shifokorlar voqea joylariga yetib borgan. Jabrlanganlar haqidagi ma’lumotlarni aniqlashtirmoqdamiz”, — deb yozdi Klichko.
Rossiyaparast Telegram-kanal “Ribar” yozishicha, dronlardan biri Kiyev temir yo‘l vokzaliga hujum qilgan.
Ukraina ichki ishlar vaziri maslahatchisi Anton Gerashchenko hujumning maqsadi vokzal yaqinidagi muhim infratuzilma obyektlaridan biri bo‘lganini ma’lum qildi. Shuningdek, u dronlar hujumi davom etayotganini, bir guruh uchar qurilmalar Kiyev viloyatining janubi va sharqida qayd etilganini aytdi. Gerashchenko ko‘p qavatli turar joy binosi zarar ko‘rganini ma’lum qildi.
“Ukraina temir yo‘llari” barcha poyezdlar grafik bo‘yicha qatnayotgani haqida xabar berdi. Yo‘lovchilarga o‘z poyezdlarini yerosti boshpanalarida kutish taklif qilingan.
Ukraina OAVlari Kiyev markazida harakat to‘xtatilgani haqida xabar berdi.
Havo hujumlari haqida Dnepropetrovsk, Odessa, Nikolayev, Zaporojye va Sumi viloyatlaridan ham xabarlar kelib tushmoqda.
Ukrainaning eng yirik shaharlariga hujumlar o‘tgan hafta boshidan buyon davom etmoqda. Vladimir Putin buni Rossiyadagi teraktlarga javob deb atadi, ulardan biri sifatida prezident Qrim ko‘prigidagi portlashni tilga oldi.
14-oktabr, juma kuni esa Putin “hozir yoppasiga beriladigan zarbalarga zarurat yo‘qligi, ayni paytda boshqa vazifalar turgani” haqida aytgandi.
Ukraina shaharlariga hujum
10-oktabr kuni ertalab Rossiya Ukraina shaharlariga yoppasiga raketa hujumi uyushtirdi. Rossiya Mudofaa vazirligi mudofaa, energetika va aloqa obyektlariga hujum qilinganini aytdi, biroq fuqarolik obyektlari ham o‘qlar yomg‘iri ostida qolgan. Reuters qayd etishicha, bu urush boshlanganidan buyon Rossiyaning eng yirik havo hujumi bo‘lgan.Rossiya prezidenti Vladimir Putin 10-oktabr kuni ertalab Ukraina shaharlarining o‘qqa tutilishi Kerch bo‘g‘ozidagi Qrim ko‘prigida sodir bo‘lgan portlashga javob bo‘lganini aytdi. Biroq Ukraina prezidenti ofisi maslahatchisi Mixail Podolyak raketa zarbalari Qrim ko‘prigidagi portlashga aloqasi yo‘qligini ta’kidladi. “Rossiya armiyasining Ukraina shaharlariga yo‘naltirilgan bugungi raketa zarbalari bir necha hafta oldin rejalashtirilgan va Qrim ko‘prigidagi portlash bilan bog‘liq emas”, — dedi Podolyak.
Izoh (0)