Эрон президенти Иброҳим Раисий АҚШ ва Жо Байденни мамлакатда тартибсизлик қўзғатишда айблади, деб хабар бермоқда IRNA.
Иброҳим Раисий ўз нутқида «Америка президенти баёнотлари билан Эронда террор, тартибсизлик ва вайронагарчиликни қўзғатмоқда», деб таъкидлади.
«АҚШ Эрондаги ижобий янгиликлардан ғазабланади ва муаммолар юзага келишидан хурсанд бўлади. Мамлакатдаги кўплаб вандализм, қотиллик ва тартибсизликларда Қўшма Штатларнинг ролини кўриш мумкин. 70 йил давомида сионистик режимнинг Фаластиндаги жиноятларини қўллаб-қувватлагани, шунингдек, 20 йил Афғонистонда босқинчилик ва урушни қўзғатгани уларнинг ҳаракатларига яққол мисолдир», — деди Раисий.
Аввалроқ Эрон олий раҳнамоси Оятуллоҳ Али Хоманаий ҳам мамлакатдаги оммавий намойишларда АҚШ ва Исроилни айблаган эди.
Эрондаги ҳижоб билан боғлиқ намойишлар
Эронда оммавий норозиликлар сентябрь ўрталаридан буён давом этмоқда, уларга эронлик қиз Маҳса Аминийнинг ўлими сабаб бўлди. 22 ёшли қиз 13 сентябрь куни ҳижобни нотўғри ўрагани учун ахлоқ полицияси томонидан ҳибсга олинган. Шундан кейин у комага тушиб қолган ва бир неча кун ўтгач, вафот этган. Ҳукумат талқинига кўра, қиз полиция участкасига олиб келинган ва у ерда юрак хуружини бошидан ўтказган. Аминийнинг қариндошлари даъво қилишича, унинг саломатлиги билан боғлиқ муаммолари бўлмаган, улар текширув ўтказилишини талаб қилмоқда.Ахлоқ полицияси
Эрон Ислом Республикаси Ҳуқуқ-тартибот кучлари Ибрат патрули («ахлоқ полицияси») — Эрон Ички ишлар вазирлиги назорати остидаги ҳуқуқ-тартибот органи. 2005 йилда алоҳида тузилма сифатида ажралиб чиққан. Ибрат патрули вазифаларига Эрон фуқаролари ва чет элликларнинг жамоат жойларида шариат бўйича муносиб кийиниб юришини таъминлаш киради.Аёлларнинг бошини ёпмай юриши, рўмол ёки ҳижобни нотўғри тақиши, авратни ёпмайдиган кийим кийиши, баъзи ҳолларда эса «бегона эркак билан яқиндан мулоқот қилиши» уларни ҳибсга олиш учун асос бўлиб ҳисобланади.
Изоҳ (0)