Qashqadaryoda tug‘ilgan chaqaloq Samarqandda yo‘qolgandi. Bosh prokuratura chaqaloq izidan tushilganini ma’lum qildi. Toshkentda esa amaldorlar uchun qurilgan bino mashmashasining isi chiqdi. “Daryo” yakunlangan haftaning eng shov-shuvli voqealarini esga olishda davom etadi.
Qashqadaryo viloyatining Chiroqchi tumanida tug‘ilgan chaqaloq davolanish uchun Samarqand shahridagi shifoxonaga olib borilgani va shifoxonada dom-daraksiz yo‘qolgani xabar berilgandi. “Daryo”ga bu haqda takroran murojaat qilgan er-xotin farzandining yo‘qolishi bilan bog‘liq jarayon imi-jimida yopilib ketayotganini, Samarqand shahar IIB, Tergov bo‘limi ishni yopganini ma’lum qilgandi.
Shundan so‘ng voqeaga munosabat bildirgan Bosh prokuratura holat nazoratga olinganini, tez orada qo‘shimcha ma’lumot berilishini bildirdi. Va ko‘p o‘tmay Samarqand shahar IIB Tergov bo‘limining dastlabki xulosasi yetarlicha o‘rganilmay chiqarilganini, shu sabab dastlabki tergov xulosasi bekor qilinib, qo‘shimcha tergov harakatlari boshlanganini bildirdi.
Yakunlangan haftada spirtli ichimlik sabab qashqadaryolik direktor ishidan ayrilgan bo‘lsa, Toshkentda 4 nafar kishi spritli ichimlikdan zaharlanish oqibatida vafot etdi.
Chiroqchi tumanidagi 67-maktab direktori maktab qorovulxonasida hamkasblari bilan spirtli ichimlik iste’mol qilgani aytilgan video tarqalgach, direktor garchi shisha idishdagi spirtli ichimlik ekanini inkor etsa-da, o‘z xohishi bilan ariza yozdi va lavozimidan olindi. Toshkent shahrining Yashnobod tumanida esa spirtli ichimlik iste’mol qilgan 3 nafar erkak va bir ayol zaharlanish ortidan vafot etdi.
Toshkent viloyatining Zangiota tumanida 50 ming nafar aholi foydalanishi ko‘zda tutilgan yer osti yo‘li qurilishining to‘xtab qolishi jamoatchilik, xususan jurnalist va blogerlar muhokamasiga sabab bo‘ldi. Mazkur vaziyat haqida batafsil axborot berishga uringan Toshkent viloyati hokimligi Zangiota tumanida matbuot anjumani tashkil qilib, OAV vakillarini qiziqtirgan savollarga javob berdi.
Unda so‘z olgan yer osti yo‘li qurilishi buyurtmachilari qurilish ishlari “snos” muammolari sabab to‘xtab qolganini aytgan bo‘lsa, hokimlik xususan Toshkent viloyati mas’ullari buni inkor etdi. Hokimlik mas’ulining so‘ziga ko‘ra, haqiqatdan ham “snos” muammosi bor, biroq, buyurtmachilar aynan qaysi muammo ularning ishiga to‘sqinlik qilayotganini aniq aytsa, muammoni bartaraf etib, qurilish ishlari davom etishiga imkoniyat yaratib berishini bildirdi. Buyurtmachilar va mas’ullar fikrini tinglagan aholi, shuningdek mahalliy Kengash deputati hududda 13 milliard so‘mlik ish bajarilganiga ishonmasligini ta’kidladi.
Qurilish jarayonlari bilan bog‘liq ajabtovur voqealar poytaxtda ham sodir bo‘lgani, mansabdorlar binosini ta’mirlagan quruvchilar olti oydan beri ish haqini ololmay sarson bo‘layotgani ma’lum bo‘ldi.
Bu haqda “Daryo”ga murojaat qilgan quruvchilar Bosh prokuratura huzuridagi Iqtisodiy jinoyatlarga qarshi kurashish departamentining ma’muriy binosini ta’mirlaganini, sal kam 600 million so‘mlik ish haqini ololmay sarson bo‘layotganini aytdi.
Bino ta’mirida 40 nafarga yaqin quruvchini ishlatgan quruvchi Jasur Namozov “Biz peshona terimiz haqini so‘rayapmiz. Bu binoda ishlayman deb kelganlar oilasi uchun, bola-chaqasini boqish uchun Toshkentga kelib ishlagan. Ular ana shu haqini so‘rayapti”, — dedi.
Izoh (0)