Farg‘onada ayolning plastik kartasidan 13 million 500 ming so‘m pulni yechib olgan erkakka jinoyat ishi qo‘zg‘atildi. Bu haqda “Daryo”ga viloyat IIB axborot xizmati ma’lum qildi.
Qayd etilishicha, Toshloq tumanida yashovchi A.N. ismli ayol ichki ishlar bo‘limiga murojaat qilib, 2022-yilning 22-iyun kuni noma’lum shaxs Telegram ijtimoiy tarmog‘i orqali ishonchiga kirib, plastik kartasidan 13 million 500 ming so‘m pulni yechib olganini ma’lum qilgan.
Mazkur holat yuzasidan Toshloq tumani IIB huzuridagi tergov bo‘linmasi tomonidan Jinoyat kodeksining 168-moddasi 1-qismi (firibgarlik) bilan jinoyat ishi qo‘zg‘atilgan.
Olib borilgan tezkor surishtiruv ishlari natijasida ushbu jinoyatni A.O‘. ismli shaxs sodir etgani aniqlanib, unga nisbatan sud tomonidan “qamoqqa olish” tarzidagi ehtiyot chorasi qo‘llanilgan.
Hozirda holat Jinoyat kodeksining 169-moddasi (o‘g‘rilik) 3-qismi “b” bandiga qayta malakalanib, tergov harakatlari olib borilmoqda.
Izoh (0)