“Sal kam 600 mln so‘m pulimizni berishmayapti”. Toshkentda amaldorlarga xizmat qiluvchi bino ta’mirini amalga oshirgan quruvchilar haqini ololmay sarson bo‘lmoqda (video)

Bosh prokuratura huzuridagi Iqtisodiy jinoyatlarga qarshi kurashish departamentining ma’muriy binosini ta’mirlagan quruvchilar ish haqini ololmay sarson bo‘lmoqda. Bu haqda “Daryo”ga murojaat qilgan quruvchilar mas’ullar ularni olti oydan beri ovora qilib, ish haqini bermayotganini aytmoqda.

Mazkur bino ta’mirida 7 nafar ishchisi bilan ishtirok etgan quruvchi Jamol Kenjayev ta’mirlash ishlarida 2021-yilning sentabr oyidan 2022-yilning aprel oyiga qadar ishtirok etishganini, shu paytga qadar mehnati uchun jami hisobda 50 million so‘m olishganini, yana 80 million so‘m ish haqi qolib ketganini aytmoqda.

Bino ta’miriga quruvchi sifatida jalb qilinib, 7 nafar ishchimiz bilan birga ishladik. Ta’mirlash ishlarida 2021-yilning sentabr oyidan 2022-yilning aprel oyigacha ishtirok etib, yetti kishi 50 million so‘m pul olganmiz. Yana 80 million ish haqimiz qolib ketgan. Ammo ololmayapmiz. Bizni ishga jalb qilgan quruvchiga murojaat qilsak, bizning buyurtmachimiz qamalib ketdi deydi. Departamentga murojaat qilsak, ishga jalb qilgan quruvchingga bor deydi. Xullas, o‘rtada biz sarson bo‘lyapmiz, — deydi qurilish ishlarida qatnashgan murojaatchi Jamol Kenjayev.

Jamol Kenjayev qurilishda qatnashgan sheriklari mehnat haqini undan talab qilayotganini, u esa ikki o‘t orasida qolganini bildirmoqda.

Eng yomoni men bilan birga bu yerga ishlashga kelgan 7 nafar sherigim meni biladi va pulni mendan so‘rayapti. Men esa Jasur akadan talab qilyapman. Jasur aka departament boshlig‘i pul beraman deganini, ammo haligacha bermaganini aytib, bahona qilyapti, — deydi murojaatchi.

Mehnat qilib pulini ololmayotganlardan yana biri Mirzohid Yo‘ldoshev ham 80-100 million so‘m ish haqiga kuyib qolayotganini aytmoqda.

Oddiy quruvchi sifatida mehnat qilib, 50 million so‘m ish haqimizni olganmiz, ammo 80-100 million so‘mga yaqin pulimiz qolib ketgan. Sarson qilishmoqda. Shu binoda o‘tirganlar bizga quloq solmay mehnat haqimizni yeb ketishmoqda, — deydi u.

Qora mehnat qilib ish haqini ololmayotganlarning yana biri Zuhriddin Mengliyev 7 oylik mehnati davomida 30 million so‘m pul olganini, ayni kunda esa kamida 100 million so‘m mablag‘i berilmayotganini aytmoqda.

U yoqqa bor, bu yoqqa bor deb, bir yildan beri sarson qilishyapti. Ayni kunda bu bino ta’miridagi mehnatimiz evaziga 100 million so‘m pul olishimiz kerak. Ammo berishmayapti, — deydi Zuhridding Mengliyev.

Pulini ololmayotgan ishchilarni ishga jalb qilgan quruvchi Jasur Namozovning “Daryo”ga bildirishicha, u departament binosi ta’mirini boshlashdan avval Bosh prokuratura huzuridagi Iqtisodiy jinoyatlarga qarshi kurashish departamenti boshlig‘i Dilshod Rahimov bilan shaxsan ko‘rishgan.

Ishni boshlashdan avval Rustam aka bilan gaplashib, departament boshlig‘i Dilshod akaning oldiga kirganmiz. Dilshod akaning o‘zi bu departament binosi ekanini, shu sabab boshqalarga nisbatan arzonroq qilib, ta’mirlab berishimizni so‘radi. Boshqa ustalar kv/metrini 18 dollardan qilayotgan bo‘lsa, men Dilshod akaning iltimosiga ko‘ra 16,5 dollarga tushirdim. Qolaversa, Dilshod aka agar firma orqali pul to‘lansa soliqlari bilan ko‘payib ketishini aytib, naqd pul berishini bildirdi. Shu kelishuvga ko‘ra, men bu binoda 800 million so‘mlik ishni bajardim. Salkam 40 kishini olib kelib ishlatdim. Endi esa 600 million so‘mga yaqin pulimizni ololmay sarsonmiz. Meni nafaqat ishchilardan, qurilish materiallari sotuvchi tanishlarimdan ham qarzim bor. Ammo endilikda Dilshod akaning oldiga olib kirishmayapti. Ataylab uchrashtirishmayapti, — deydi Jasur Namozov.

Jasur Namozovning ma’lumot berishicha, u boshchiligidagi quruvchilar binoning tashqi fasad qismini ta’mirlagan.

Bizni departament xodimi Rustam Safarov bu yerga olib kelgan. Rustam aka orqali Dilshod Rahimov bilan ko‘rishdik va aynan departament boshlig‘ining pulingni tiyin-tiyinigacha beraman degan va’dasini olganmiz. Biz binoning tashqi fasad qismini va devorlarini ta’mirlab, 800 million so‘mlik ishni amalga oshirganmiz. Shundan 200 milliondan ortig‘i berilgan bo‘lsa, 600 million so‘mga yaqin pulimizni ololmayapmiz, — deydi u.

Jasur akaning aytishicha, ayni kunda Rustam Safarov uni departament boshlig‘i bilan uchrashtirmaslikka urinmoqda.

“Daryo” jurnalisti ish haqini ololmayotgan ishchilar murojaatiga ko‘ra, Bosh prokuratura huzuridagi departamentda bo‘lib, mas’ullar bilan suhbatlashishga urindi.

Dastlab, jurnalist bilan kameralarsiz gaplashishni lozim topgan departament mas’ullari va axborot xizmati xodimi Dilrabo Kuryazova aniq savollarga javob berishdan tiyilib, oldi-qochdi gaplar bilan chalg‘itishga urindi. Shu ma’lumotlarini mikrafon va kamera qarshisida gapirishlarini iltimos qilganimizda esa “bizda mumkinmas”, deyishdan nariga o‘tmadi. Shundan so‘ng “Daryo” jamoasi Bosh prokuratura axborot xizmati rahbariga murojaat qilib, departament mas’ullaridan axborot olib bo‘lmayotganini, bu borada ko‘mak berishlarini iltimos qildi.

Shundan so‘ng “tilga kirgan” departament axborot xizmati “Daryo” nashrining pulini ololmayotganini aytayotgan quruvchilar haqiqatdan ham shu bino ta’mirida ishtirok etganmi? Agar ular shu bino ta’mirida ishtirok etgan bo‘lsa, ularning 600 million so‘mlik ish haqini ololmayotgani haqidagi, shuningdek quruvchilar mas’uli Jasur Namozovning departament boshlig‘i Dilshod Rahimov bilan ko‘rishganiyu, mas’ul soliqlardan qochish uchun quruvchiga naqd shaklda pul to‘lab bermoqchi bo‘lgani haqidagi iddaolari qanchalik haqiqat ekani borasidagi savollarini ochiq qoldirdi.

Bosh prokuratura huzuridagi Iqtisodiy jinoyatlarga qarshi kurashish departamentining ma’muriy binosini rekonstruksiya qilish uchun Toshkent shahar hokimi qarori chiqqan. Qarorga asosan hokimlik qoshidagi “Yagona buyurtmachi xizmati injiniring kompaniyasi” davlat unitar korxonasi bilan shartnoma tuzilgan. Shartnomaga ko‘ra, DUK tomonidan qonunchilikda belgilangan tartibda tender o‘tkazilib, “Saddiniso Habibullo” xususiy korxonasi g‘olib deb topilgan. Ayni kunda qurilish ishlari bitmagan. Biroq “Yagona buyurtmachi xizmati injiniring kompaniyasi” davlat unitar korxonasi so‘roviga ko‘ra, barcha to‘lovlar to‘liq amalga oshirilgan va qarzdorlik mavjud emas, — deydi departamentning Jamoatchilik bilan aloqalar va huquqiy axborot bo‘limi bosh inspektori Dilrabo Kuryazova.

“Daryo” nashri “Saddiniso Habibullo” xususiy korxonasi mas’ullari bilan ham gaplashishga urindi. O‘zini Alisher deb tanishtirgan xususiy korxona ishchisi ayni paytda boshlig‘i qamoqda ekanini, shu sabab bu masalada boshqa ma’lumot berolmasligini, biroq departament binosini ta’mirlash ishlari uchun to‘lab berilishi lozim bo‘lgan pullar to‘lanmaganini, shu sabab ular quruvchilarga pul berolmayotganini bildirdi.

Biz peshona terimiz haqini so‘rayapmiz. Bu binoda ishlayman deb kelganlar oilasi uchun, bola-chaqasini boqish uchun Toshkentga kelib ishlagan. Ular ana shu haqini so‘rayapdi, — deydi Jasur Namozov.

Qiziq, bino ta’miri tugagan, departament mas’ullari va amaldorlar binoda faoliyat yuritmoqda. Shuningdek, qurilish ishlari tugallanmasa-da, bino ta’miri uchun so‘ralgan barcha mablag‘lar Toshkent shahar hokimligi huzuridagi “Yagona buyurtmachi xizmati injiniring kompaniyasi”ga o‘tkazib berilgani aytilmoqda. Quruvchilar esa bu pulni ko‘rmaganmiz va haligacha ololmayapmiz demoqda. Xo‘sh, quruvchilarning puli qayerda ekaniga aniqlik kirituvchi mas’ul bormi?

“Daryo” voqealar rivojini kuzatishda davom etadi.