Buxoroda yo‘llarni kengaytirish uchun eski binolar vayron qilinayotgani haqidagi xabarlar rad etildi

Ijtimoiy tarmoqlarda Buxoroda yo‘llarni kengaytirish va soxta turistik joylarga o‘rin ochish uchun eski binolar vayron qilinayotgani haqida xabarlar tarqaldi. Viloyat Madaniy meros boshqarmasi buni rad etdi.

“Sobiq Shahriston bozori hududida Fanlar akademiyasi mutaxassislari tomonidan arxeologik tadqiqot ishlari olib borilmoqda. Arxeologik qazishma ishlari olib borilgan hudud sayyohlar ko‘rishi uchun oynali shisha to‘siqlar bilan o‘rab olingan. U yerda hech qanday qurilish yoki yo‘llarni kengaytirish ishlarini amalga oshirish rejalashtirilmagan”, — deyiladi munosabatda.

Shuningdek, mazkur hududda arxeologik park tashkil etish bo‘yicha ishlar olib borilayotgani bildirilgan.

Bundan tashqari, Buxoro shahar, Haqiqat ko‘chasida joylashgan Mir Said Kamol madrasasida ham Buxoro mintaqaviy restavratsiya markazi tomonidan ta’mirlash-tiklash ishlari olib borilayotgani qayd etilgan.

“Hozirda madrasaning ta’mirtalab (avariya) holatga kelib qolgan devori qayta tiklanmoqda. U yerda hech qanday qo‘shimcha qurilish va yo‘llarni kengaytirish ishlarini olib borish rejalashtirilmagan”, — deyiladi xabarda.