Surxondaryo va Namangan viloyatlarida kredit mablag‘larini maqsadsiz sarflab, o‘zlashtirish holatlari aniqlandi. Bu haqda Bosh prokuratura huzuridagi departament xabar berdi.
Departamentning Qiziriq tuman bo‘limi tomonidan ATB “Xalq banki” Qiziriq filialining murojaatiga asosan o‘tkazilgan tergovga qadar tekshiruvda “B.S.” MCHJ rahbari E.B. ushbu bank filiali mas’ul shaxslari bilan o‘zaro til biriktirib, qurilish mahsulotlari ishlab chiqarish uskunalarini sotib olish maqsadida 1,7 milliard so‘m kredit ajratilishiga erishib ushbu mablag‘larni maqsadsiz sarflgani aniqlangan.
Ular kredit ta’minoti uchun garovga qo‘yilgan noturar ko‘chmas mulk binosi qiymatini sun’iy ravishda oshirib ko‘rsatib, kreditnng asosiy qarzi va foizlari hisobidan bank manfaatlariga 1,8 milliard so‘m zarar yetkazgan.
Departamentning Chortoq tuman bo‘limi tomonidan ATB “Xalq banki” Chortoq filiali murojaatiga asosan o‘tkazilgan tergovga qadar tekshiruvda, ushbu bank filiali sobiq xodimlari 10 ta tadbirkorlik subyektlari rahbarlari bilan o‘zaro til biriktirib, bank muassasasidan tikuvchilik va chorvachilik faoliyatini rivojlantirish maqsadida 42 nafar fuqaro nomiga rasmiylashtirilgan 1 milliard so‘m kredit mablag‘ini o‘zlashtirish yo‘li bilan talon-toroj qilgani aniqlangan.
Mazkur holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 205-moddasi (hokimiyat yoki mansab vakolatini suiiste’mol qilish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)