Farg‘ona hokimi “Zakovat”ning yakuniy bosqichida g‘olib bo‘lgan maktab o‘quvchilari va ularning ustozini rag‘batlantirdi

Farg‘ona viloyati hokimi Xayrullo Bozorov “Zakovat” intellektual o‘yinining final bosqichi g‘olibi bo‘lgan o‘quvchilar bilan uchrashdi. Bu haqda “Daryo” muxbiri Azizjon Ermatov xabar bermoqda.

Qayd etilishicha, 2022-yilning 9-oktabr kuni Toshkent shahrida umumta’lim maktablari o‘quvchilari o‘rtasida “Zakovat” intellektual o‘yinining yakuniy bosqichi o‘tkazilgan. Unda respublikaning har bir hududidan 3 tadan jami 42 ta jamoa ishtirok etgan. Final bosqichida Farg‘ona tumanidagi 36-maktab jamoasi g‘oliblikni qo‘lga kiritgan.

Xayrullo Bozorov o‘quvchilarni g‘oliblik bilan qutlab, ularning har biri haqida tengdoshlariga ibrat sifatida alohida maqolalar va ko‘rsatuvlar tayyorlanishini ma’lum qilgan.

Uchrashuvda g‘olib jamoa a’zolari va ularning ustoziga viloyat hokimining qimmatbaho sovg‘alari topshirilgan.

Ma’lumot uchun, prezident qaroriga asosan, turnir sovrindori bo‘lgan o‘quvchilarga bir yil davomida har oy “Zakovat” stipendiyasi beriladi.

Shuningdek, g‘olib o‘quvchilar oliy ta’lim muassasalariga to‘lov-kontrakt asosida imtihonlarsiz talabalikka qabul qilinadi.