Rossiya-Belarus mintaqaviy qo‘shinlari guruhining asosini Belarus harbiy xizmatchilari, shuningdek, yaqin kunlarda mamlakat hududiga kela boshlaydigan Rossiyaning alohida harbiy tuzilmalari tashkil qiladi, dedi Belarus rahbari o‘rinbosari. U qo‘shinlarning qo‘shma guruhlanishini “sof mudofaa loyihasi” deb atadi. Bu haqda “RBK” xabar berdi.
“Harbiy xavfsizlik sohasida tenglikni ta’minlash va Belarus Respublikasida tinchlikni saqlash maqsadida hududimizda qo‘shinlarning mintaqaviy guruhini yaratish to‘g‘risida qaror qabul qilindi. U tinchlik davrida Belarus Respublikasi qurolli kuchlari, shuningdek, Rossiya Federatsiyasining alohida harbiy tuzilmalariga asoslanadi”, — dedi Tumar.
U Belarusda Rossiya bilan qo‘shma qo‘shinlar guruhining joylashtirilishini NATO bir necha yillardan buyon mamlakat chegaralari yaqinida o‘z harbiy salohiyatini oshirayotgani bilan izohladi. Uning so‘zlariga ko‘ra, Belarus bilan chegaradosh hududlarda zamonaviy hujum qurollariga ega bo‘linmalar shakllantirilmoqda, Polsha va Boltiqbo‘yi mamlakatlarida harbiy infratuzilma yaxshilanmoqda.
“Bu faktlar Belarus Respublikasi va Ittifoq davlatiga harbiy xavfsizlik sohasida tahdid kuchayib borayotganidan dalolat beradi va shoshilinch choralar ko’rishni talab qiladi”, — dedi Belarus Bosh shtab rahbari o‘rinbosari.
10-oktabr kuni Belarus rahbari Aleksandr Lukashenko Rossiya prezidenti Vladimir Putin bilan qo‘shma mintaqaviy qo‘shinlar guruhini joylashtirish bo‘yicha kelishuvlar imzolanganini e’lon qilgan edi. U bunday qadam zaruratini hozirgi tahdid darajasi bilan bog‘lagan. Uning so‘zlariga ko‘ra, Minsk “mingdan ortiq” rus harbiylarini qabul qilishga tayyor. “Agar tahdid darajasi hozirgi darajaga yetsa, biz Ittifoqdagi guruhlashdan foydalanishni boshlaymiz”, — degan Lukashenko.
Shu bilan birga, Lukashenkoning ta‘kidlashicha, Minsk “norasmiy kanallar orqali” Ukraina tomonidan Belarusga zarba berish haqida ogohlantirish olgan.
Oktyabr oyi boshida Belarus chegara xizmati rahbari Anatoliy Lappo Ukraina chegarasidagi “bosim” haqida gapirdi. Unga ko‘ra, Ukraina Qurolli kuchlari chegara yaqinidagi barcha avtomobil va temir yo‘l ko‘priklarini portlatgan, shuningdek, barcha chegara yo‘llarini minalashtirgan. Shu bilan birga, Lukashenkoning aytishicha, Kiyev Belarus chegarasiga 15 minggacha askar olib kelgan.
Rossiya Ukrainaga urush ochganidan buyon Lukashenko bir necha bor Minsk unda ishtirok etishni rejalashtirmaganligini aytgan, ammo kuzda u buni amalga oshirayotganini tan oldi, lekin harbiylarini hech qayerga yubormayotganini aytdi.
Izoh (0)