Беларусда аксилтеррорчилик операцияси режими жорий этилди. Бу ҳақда мамлакат ташқи ишлар вазири Владимир Макей «Известия» газетасига берган интервьюсида маълум қилди.
Унинг сўзларига кўра, Украина «бегуноҳ» эканлигини ва Беларусь билан чегарада ҳеч нарса режалаштирмаётганини айтаётган бўлса-да, «дунёда кутилмаган нарсалар кўп бўляпти», шунинг учун Минск «ҳеч кимга ишона олмайди». Мамлакат ўз хавфсизлиги ҳақида қайғуриши ва шундай қилиши керакки, «еримизнинг бир метр жойига ҳам истилочининг оёғи тегмасин», деди вазир.
«Мамлакатимиз раҳбари хавфсизлик тузилмалари билан бир қатор йиғилишлар ўтказди, аксилтеррорчилик операцияси режими киритилди, — деди Макей. — Ҳақиқатан ҳам, баъзи чегарадош давлатлар томонидан провокациялар режалаштирилаётгани, улар сал бўлмаса Беларуснинг алоҳида қисмларини эгаллаб олиш билан боғлиқлиги ҳақида ахборот келиб тушганди».
Ташқи сиёсий идора раҳбари таъкидлашича, Беларусь хавфсизлик кучлари «чегарадош давлатлар томонидан амалга оширилиши мумкин бўлган ҳар қандай провокацияларга» жавоб қайтаришга тайёр.
10 октябрь куни Беларусь президенти Александр Лукашенко мамлакат «норасмий каналлар орқали» Украина томонидан зарба берилиши ҳақида огоҳлантирилганини айтганди. Унинг фикрича, бундай зарба «ҳарбийлар нуқтаи назаридан тентаклик бўлган бўларди», лекин «жараён бошланган». «Агар улар ифлос қўллари билан Беларусь ҳудудининг бир метрига ҳам тегинадиган бўлса», яқинда Қрим кўпригида бўлган портлаш «ҳеч гап бўлмай қолади», дея огоҳлантирди Лукашенко.
Шунингдек, у даъво қилишича, Польша бир неча соатлар ичида ўз қўшинларини Беларусь чегараларига жойлаштириши мумкин.
Лукашенконинг сўзларига кўра, у «Иттифоқ давлатининг ғарбий чегараларида вазият кескинлашгани муносабати билан» Владимир Путин билан қўшма минтақавий қўшин гуруҳларини кучайтириш ҳақида келишиб олган.
Беларуснинг Россия-Украина низосига муносабати
Россия Украинада 24 февралдан буён махсус операция олиб бормоқда. Лукашенко Беларусь низода қатнашмаётганини ва қатнашишни режалаштирмаётганини бир неча марта таъкидлаган. «Тағин мени қандайдир ҳужумни режалаштиряпти, Украинани Беларусь ҳудудидан бомбардимон қилмоқчи деб ўйламанг. Сизнинг ва менинг фарзандларимиз жанг қилишини ҳеч ҳам истамайман. Улар нимани деб жанг қилиши керак?» — деган эди у августда.Сентябрда Лукашенко Беларусь ўз ҳудуди орқали Россия армиясига яширинча зарба берилишига йўл қўймаслигини маълум қилди. Кейинроқ эса у Беларусь ҳеч кимга ҳужум қилмаганини ва ҳужум қилмаслигини айтди ва Украинада қон тўкилишини тўхтатиш учун ҳамма чорани кўришга ваъда берди.
Кейинроқ Александр Лукашенко Беларусь Россия Украинага қарши олиб бораётган «махсус ҳарбий операция»да қатнашаётганини, аммо ўз ҳарбийларини зиддият ҳудудига юбормаётганини айтди. «Украинадаги махсус ҳарбий операциядаги иштирокимизга келсак, биз унда қатнашяпмиз. Буни яширмаяпмиз. Лекин биз ҳеч кимни ўлдирмаяпмиз. Ўз ҳарбийларимизни ҳеч қаерга юбормаяпмиз. Биз ўз мажбуриятларимизни бузмаяпмиз», — деди Лукашенко.
Изоҳ (0)