Estoniya hukumati asosiy maktablar va gimnaziyalar to‘g‘risidagi qonunga o‘zgartirishlar kiritishni hamda 2030-yilgacha ta’limni eston tiliga o‘tkazish bo‘yicha chora-tadbirlar rejasini tasdiqladi. Bu haqda Vazirlar Mahkamasi matbuot xizmatiga tayanib, “Interfaks” xabar berdi.
Tasdiqlangan qonun loyihasi ta’lim tilini eston tiliga o‘tkazish uchun asos va shart-sharoitlar yaratishni nazarda tutadi.
O‘tish maktabgacha ta’lim muassasalarida 2024/2025-o‘quv yilida, boshlang‘ich maktablarning 1 va 4-sinflarida esa 2030-yilda yakunlanishi kutilmoqda. 2029/2030-o‘quv yiligacha eston tilida o‘qitish ulushi o‘quv rejasining kamida 60 foizini, boshqa tilning ulushi 40 foizgacha bo‘lishi kerak.
Qonun loyihasi muayyan maqsadli guruhlar uchun, masalan, o‘zlashtirishda qiynaladigan o‘quvchilar yoki alohida ehtiyojli talabalar uchun ta’limda eston tilidan tashqari yoki eston tili o‘rniga boshqa tildan foydalanish imkonini beradi.
Estoniya hukumati eston tilida o‘qitishga o‘tish bo‘yicha batafsil rejani tasdiqladi, unda 2030-yilgacha ko‘riladigan zarur tadbirlar, muddatlar va manbalar ko‘rsatilgan. Xususan, rejada maktablarni malakali o‘qituvchi va yetakchilar bilan ta’minlash, ularning rag‘batlantirilishini oshirish chora-tadbirlari nazarda tutilgan.
2023-yil sentabrdan boshlab respublikaning asosan rusiyzabonlar yashaydigan shimoli-sharqidagi eston tilida dars beradigan barcha o‘qituvchilar uchun asosiy ish haqining 1 yarim, boshlang‘ich sinf o‘qituvchilari uchun esa 1,3 stavkasi joriy etiladi. Ushbu hududga ko‘chib o‘tishga tayyor bo‘lgan o‘qituvchilar uchun imtiyozlar ko‘zda tutilgan: qo‘shimcha nafaqa, subsidiyali uy-joy va boshqa chora-tadbirlar.
Bundan tashqari, mutasaddilar joriy yildan boshlab boshlang‘ich, umumiy va kasb-hunar ta’limi bosqichlarida til o‘rgatish va ta’lim tili ustidan nazoratni kengaytirishga qaror qildi.
Izoh (0)