Surxondaryo viloyati Termiz shahridagi “Meridian” mehmonxonasi xatlovga olindi. Bu haqda Majburiy ijro byurosi axborot xizmati “Daryo”ga ma’lum qildi.
Termiz tumanlararo iqtisodiy sudining 2022-yil 22-avgustdagi sud hujjatiga asosan qarzdor korxona hisobidan o‘z vaqtida to‘lanmagan kredit qarzdorligi uchun jami 1 million 674 ming 625 dollar miqdori qarzdorlik undirish haqidagi ijro hujjati byuroning viloyat boshqarmasi ish yurituvga qabul qilinib, ijro harakatlariga kirishilgan.
Mazkur ijro hujjatiga asosan undiruv “Meridian hotel” MCHJga tegishli bo‘lgan Termiz shahridagi 6 qavatli mehmonxonaga qaratish belgilangan. Byuroning viloyat boshqarmasi tomonidan olib borilgan majburiy ijro harakatlari davomida qarzdor jamiyat rahbari ogohlantirilib, bankdagi barcha hisob raqamlariga band solindi. Shuningdek, sud qarori ijrosini ta’minlash maqsadida garov mulki hisoblangan mehmonxona xolislar va tegishli mutaxassislar yordamida ko‘zdan kechirilib, xatlovga olindi.
Qarzdorlik belgilangan muddatda to‘lab berilmagan taqdirda, ushbu mehmonxona onlayn auksion savdolari orqali realizatsiya qilinishi haqida ogohlantirildi. Hozirgi kunda qarzdor jamiyatga tegishli bo‘lgan “Meridian” mehmonxonasi 16 milliard 170 million 96 ming so‘mga baholanib, realizatsiya qilish choralari ko‘rilmoqda.
Izoh (0)