“Uzbekistan Airports” matbuot xizmati Moskva–Namangan–Moskva aviaqatnovi bekor qilingani yuzasidan rasmiy munosabat bildirdi.
Ijtimoiy tarmoqlarda “Yamal” aviakompaniyasining Moskva–Namangan–Moskva yo‘nalishi bo‘yicha LLM9205/9206 aviaqatnovi bekor qilingani haqida ma’lumotlar tarqaldi.
Ma’lum bo‘lishicha, 13-oktabr kuni Rossiya aviakompaniyasining bortida 220 yo‘lovchi bo‘lgan havo kemasi Moskva vaqti bilan soat 15:40 da Domodedovo aeroportidan Namanganga uchishi rejalashtirilgan edi. Aviakompaniya ushbu aviaqatnovni amalga oshirish uchun nazorat qiluvchi organ — “O‘zaviatsiya” agentligi tomonidan tegishli ruxsat olmagani bois ushbu charter aviaqatnovi amalga oshirilmadi.
Namangan xalqaro aeroportining ushbu aviaqatnov bekor qilinishiga hech qanday aloqasi yo‘q. Aeroport xodimlari Toshkent vaqti bilan soat 23:00 da Namangandan Moskvaga qaytish kerak bo‘lgan aviaqatnoq yo‘lovchilarga vaziyat bo‘yicha atroflicha ma’lumotlar taqdim etdi.
Izoh (0)