“Daryo” nashri 13-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
BMT Bosh assambleyasi Ukraina hududlarining Rossiya tomonidan bosib olinishini qoralovchi rezolyutsiyani qabul qildi.
BMT Bosh assambleyasi Donetsk va Lugansk xalq respublikalarida hamda bosib olingan Xerson va Zaporojye viloyatlarida Rossiya tomonidan o‘tkazilgan “referendumlar”ni qoralovchi rezolyutsiyani qabul qildi, deb yozadi Meduza. Hujjat, shuningdek, Rossiyaga nisbatan Ukraina hududlarining qo‘shib olinish haqidagi arizalarini qayta ko‘rib chiqish talabini ham o‘z ichiga oladi.
BMTga a’zo 193 ta mamlakatdan 143 tasi rezolyutsiyani yoqlab ovoz berdi. Beshta mamlakat — Belarus, Shimoliy Koreya, Nikaragua, Suriya va Rossiya qarshi chiqdi. Ovoz berishda 35 ta davlat betaraf qoldi, ular orasida Xitoy, Hindiston, O‘zbekiston, Qirg‘iziston, Qozog‘iston va Tojikiston ham bor. Yana o‘nta davlat esa ovoz berishda qatnashmadi.
Jahondagi ayni vaziyatda, Yevropa Kengashi Parlament Assambleyasida Rossiya Federatsiyasini terrorchi davlat deb atalgan rezolyutsiya tasdiqlandi.
Qaror bir ovozdan ma’qullandi, zaldagi 99 nafar kengash a’zosi yoqlab ovoz berdi. Ulardan biri ovoz berishda betaraf qoldi.
“Ukraina de-fakto NATOga qo‘shildi” — Ukraina mudofaa vaziri Aleksey Reznikov
Ukraina amalda allaqachon NATO a’zosi. Bu haqda Ukraina Mudofaa vazirligi rahbari Aleksey Reznikov alyans bosh kotibi Yens Stoltenberg bilan uchrashuvdan so‘ng Twitter’da ma’lum qildi.
“NATO bosh kotibi Yens Stoltenbergga Ukrainani qo‘llab-quvvatlagani uchun minnatdorlik bildiraman. Biz uzoq yo‘lni bosib o‘tdik va de-fakto alyansga qo‘shildik”, — deb yozadi vazir.
“Yaqinimizga bomba kelib tushdi, kimdir o‘lsa, keyin yordam berishsa kerak” — Belgoroddagi o‘zbekistonlik talabalar yotoqxonada jon saqlayotganini aytishmoqda
Ukraina chegarasidan 33 kilometr narida joylashgan Rossiyaning Belgorod viloyatiga bombalar yog‘dirishda davom etmoqda. Bugun, 13-oktabr kuni ham shaharning Gubkin ko‘chasidagi turar joy binosiga bomba parchalari tushgan.
“Daryo” nashriga Belgorod viloyati hududida joylashgan Belgorod davlat texnika universitetining o‘zbekistonlik talabalaridan murojaat kelib tushgan edi. Hozirgi kunda Vladimir Shuxov nomidagi Belgorod davlat texnika universitetida 150 ga yaqin O‘zbekiston fuqarosi tahsil oladi.
Talabalardan birining “Daryo”ga aytishicha, bugun, 13-oktabr kuni ular yashayotgan yotoqxonadan taxminan 2,5 kilometr uzoqlikdagi binoga bomba tushgan. “Hamma vahimada. Kimdir o‘lsa keyin yordam berishsa kerak. Nima qilishni bilmay o‘tiribmiz. Elchixonadagilar vaziyatdan xabardor. Lekin hali biror ko‘rsatma yoki qandaydir yordam berishgani yo‘q. Telefon qilsak vaziyat o‘rganilayotganini aytishdi”, — dedi talaba yigit.
“O‘qish onlayn bo‘lyapti. Hamma yotoqxonada jon saqlab o‘tiribdi. Dekanimiz onlayn o‘qish tartibi cho‘zilishi mumkin, yurtlaringga ketsalaring ham mayli, deb aytdi”, — dedi talaba.
Ostona shahrida o'tkazilayotgan sammitda davlat rahbarlari ilgari surgan masalalar
Shavkat Mirziyoyev Osiyoda hamkorlik va ishonch choralari bo‘yicha kengashning VI sammitidagi nutqida Afg‘oniston muvaqqat hukumati bilan xalqaro muzokaralar guruhini tuzishni taklif qildi
Davlat rahbari sammitda yosh avlodni radikalizmdan asrash, ularning kuch-g‘ayratini bunyodkorlik sari yo‘naltirish uchun tizimli hamkorlik o‘rnatish kerakligini aytdi va 2023-yil Samarqandda “Avlodlar muloqoti” uchrashuvi o‘tkazishni taklif qildi. Sammitda so‘zga chiqqan Turkiya prezidenti Rajab Toyyib Erdo‘g‘on: “Bizning maqsadimiz — Ukrainadagi qirg‘inni to‘xtatish” deya ta'kidlagan.
Eslatib o'tamiz, ushbu uchrashuvda Rossiya prezidenti ham qatnashmoqda. Xususan, Vladimir Putin sammitdagi nutqida Osiyoda yangi kuch markazlari shakllanayotganini ma’lum qilgan.
Izoh (0)