Тегишли рухсат олинмагани ортидан Москва–Наманган йўналишидаги авиақатнов амалга оширилмади

«Uzbekistan Airports» матбуот хизмати Москва–Наманган–Москва авиақатнови бекор қилингани юзасидан расмий муносабат билдирди.

Ижтимоий тармоқларда «Ямал» авиакомпаниясининг Москва–Наманган–Москва йўналиши бўйича ЛЛМ9205/9206 авиақатнови бекор қилингани ҳақида маълумотлар тарқалди.

Маълум бўлишича, 13 октябрь куни Россия авиакомпаниясининг бортида 220 йўловчи бўлган ҳаво кемаси Москва вақти билан соат 15:40 да Домодедово аэропортидан Наманганга учиши режалаштирилган эди. Авиакомпания ушбу авиақатновни амалга ошириш учун назорат қилувчи орган — «Ўзавиация» агентлиги томонидан тегишли рухсат олмагани боис ушбу чартер авиақатнови амалга оширилмади.

Наманган халқаро аэропортининг ушбу авиақатнов бекор қилинишига ҳеч қандай алоқаси йўқ. Аэропорт ходимлари Тошкент вақти билан соат 23:00 да Намангандан Москвага қайтиш керак бўлган авиақатноқ йўловчиларга вазият бўйича атрофлича маълумотлар тақдим этди.