Germaniya Ukrainaga to‘rtta Iris-T SLM havo hujumiga qarshi mudofaa tizimining birinchisini yetkazib berdi. Der Spiegel qayd etishicha, bu Germaniyada bor bo‘lgan mudofaa tizimlari orasida eng zamonaviysidir.
Iris-T SLM zenit-raketa majmuasi uchta mashinadan iborat, bular — harbiy yuk mashinasiga o‘rnatilgan uchirish qurilmasi, radiolokatsiya mashinasi va qo‘mondonlik mashinasi. Zenit raketalari 20 kilometrgacha bo‘lgan balandlikda va 40 kilometrgacha masofada nishonlarni ura oladi.
Yangi qurol-yarog‘ yetkazib berilishi haqida Germaniya kansleri Olaf Shols iyun oyidayoq e’lon qilgan edi, biroq birinchi qurilma Ukrainaga noyabrdan oldin yuborilmasligi taxmin qilingandi. Oktabr boshida esa Germaniya mudofaa vaziri Kristina Lambrext Odessaga tashrifi chog‘ida Germaniya havo hujumiga qarshi mudofaa tizimining dastlabkisi “eng yaqin orada” yetkazilishini ma’lum qildi.
Qolgan uchta tizim Ukrainaga 2023-yilda yuboriladi. Aniq muddatlar hozircha noma’lum.
Shuningdek, Ukrainaga AQSHdan to‘rtta qo‘shimcha HIMARS baravar o‘t ochish reaktiv tizimlari yetib keldi. Bu haqda Ukraina mudofaa vaziri Aleksey Reznikov ma’lum qildi.
AQSH Ukraina harbiy nizo boshidan buyon qurol-yarog‘ yetkazib bermoqda. HIMARS tizimlarining birinchi partiyasi Kiyevga iyun oyida yuborilgan. Ukraina qurolli kuchlari ularda qariyb 150 km masofaga uchuvchi GMLRS snaryadlarini qo‘llaydi.
Bayden Kiyevga 625 million dollarlik yangi harbiy yordam paketi haqida 4-oktabr kuni Zelenskiy bilan suhbatda e’lon qilgan edi. Unga to‘rtta HIMARS tizimlari, 32 ta gaubitsa, artilleriya snaryadlari hamda boshqa qurol-yarog‘, texnika va o‘q-dorilar kiradi.
Izoh (0)