Yaponiya milliy valyutasining kursi bugun, 12-oktabrda 1998-yil avgust oyidan beri birinchi marta bir dollar uchun 146 iyenaga tushdi. Bu haqda Tokiodagi savdo ma’lumotlariga tayanib “TASS” xabar bermoqda.
Iyena kursining 24 yillik rekord darajadagi zaiflashuvi bir necha oy davomida inflyatsiyani nazorat qilash uchun uni oshirayotgan G‘arb markaziy banklarining diskont stavkalaridagi farqning kengayishi fonida davom etmoqda.
Yaponiya regulyatori esa bozorni rag‘batlantirish uchun stavkani deyarli salbiy darajada ushlab turadi.
Ushbu pul-kredit siyosati iyenaning zaiflashishiga va narxlarning oshishiga olib kelishi haqidagi tanqidlarga qaramay, Yaponiya markaziy banki rahbari stavkani o‘zgartirish niyatida emasligini bir necha bor ta’kidlagan.
Sentabr oyi oxirida yana bir bor qisqa muddatli foiz stavkasini minus 0,1 foiz darajasida saqlashga qaror qilindi.
Bunday sharoitda Yaponiya hukumati 1998-yildan beri birinchi marta milliy valyuta kursini barqarorlashtirish maqsadida valyuta intervensiyalarini amalga oshirgandi.
Valyuta intervensiyasi — mamlakat markaziy bankining valyuta bozoriga va valyuta kursiga chet el yoki milliy valyutaning katta summasini sotib olish yoki sotish yo‘li bilan aralashuvi.
Bu esa valyutaning qisqa muddatli mustahkamlanishiga olib keldi va u bir dollar uchun 145 iyenadan 140 iyenaga yetdi.
Izoh (0)