2022-yil oktabr holatiga ko‘ra, O‘zbekiston banklarida fuqarolarga birlamchi bozordan avtotransport vositalarini xaridi uchun qulay avtokreditlar reytingi aniqlandi. Bu haqda “Daryo”ga “Iqtisodiy sharh” jurnalidan ma’lum bo‘ldi.
Mazkur reytingni tuzishda kredit shartlari — boshlang‘ich to‘lovi, foiz stavkasi, kredit muddati va miqdori kabi omillar inobatga olingan.
Markaziy bankning statistik ma’lumotlariga ko‘ra, 2022-yil avgust oyigacha jami banklar tomonidan avtokredit uchun 4,7 trln so‘m ajratilgan.
Hozirda 33 ta bankdan faqat 24 tasi birlamchi bozordan avtotransport vositalarini xaridi uchun kreditlar taklif qilmoqda.
Birlamchi bozordan avtotransport vositalari xaridi uchun quyidagi banklar kreditlar taklif etilmayapti:
- “O‘zagroeksportbank”;
- “Ravnaq bank”;
- “Universal bank”;
- “Poytaxt bank”;
- “Hi-tech bank” (Markaziy bank tomonidan 7-oktabrda litsenziyasi bekor qilindi);
- “O‘zKDB Bank”;
- “Madad Invest Bank”;
- “Ipoteka bank”;
- “Turkiston bank” (Markaziy bank tomonidan 7-oktabrda litsenziyasi bekor qilindi).
Asosan, yuqorida ko‘rsatilgan banklarning ba’zilari avtokreditlarini vaqtincha to‘xtatib qo‘ygan.
Reyting natijalariga ko‘ra, jismoniy shaxslarga taklif etiladigan qulay avtokreditlar bo‘yicha reytingda “Saderat bank” 1-o‘rinni egaladi. Ushbu bank yillik foiz stavkasi 23 foiz, boshlang‘ich to‘lov 20 foiz, 4 yil muddatga hamda kredit miqdori 600 mln so‘mgacha bo‘lgan shartlarda kredit taklif etmoqda.
Umumiy reytingda “Ipak yo‘li bank” 2-o‘rinni egalladi. Ushbu bankda avtokredit olish shartlari, ya’ni boshlang‘ich to‘lov — 25 foiz, foiz stavkasi — 21,9 foiz, kredit miqdori — 450 mln. so‘mgacha hamda kredit muddati — 48 oy.
Reytingda 3-o‘rinni egallagan “Kapital bank” avtokredit olish uchun bankga murojaat qilgan mijozlarga qo‘yidagi shartlarda:
- boshlang‘ich to‘lovi – 20 foiz;
- yillik foiz stavkasi — 24 foiz;
- kreditni qoplash uchun ajratiladigan muddat — 60 oy;
- kredit uchun beriladigan qiymat 300 mln so‘mgacha kreditlar ajratmoqda.
“
Hisob-kitoblar Iqtisodiy tadqiqotlar va islohotlar markazi metodologiyasi bo‘yicha amalga oshirilgan
Reytingda “Asia Alliance bank” 39-o‘rinda joylashganiga sabab ushbu bank mijozlarga quyidagi shartlar asosida avtokretilar taklif qilmoqda:
- yillik foiz stavka — 27,99 foiz;
- boshlang‘ich to‘lovi – 0 foiz;
- kredit muddati — 48 oy;
- kreditning maksimal qiymati — 400 mln so‘mgacha.
Natijalarga ko‘ra, umumiy reytingda 40—41-o‘rinlarda joylashgan “Agrobank” avtokreditlar ajratish uchun quyidagi shartlarni belgilagan, boshlang‘ich to‘lovi — 25 foiz, yillik foiz stavkasi — 26-27 foiz mos ravishda, 36-48 oy muddatga va kredit qiymati 300 mln so‘mgacha.
Birlamchi bozordan avtotransport vositalarini xarid qilish uchun avtokreditlar bo‘yicha eng past stavkani “Ipak yo‘li bank” (21,9 foiz), “Asaka bank” (23 foiz), “Saderat bank” (23 foiz) taqdim etayotgan bo‘lsa, eng yuqori stavka “Davr bank” (27,99 foiz) va “Asia Alliance bank” (27,99 foiz) tomonidan taklif etilmoqda.
Iyul oyidagi tahlilga nisbatan banklar tomonidan ajratilayotgan avtokreditlar foiz stavkasi -4 dan +1 foizgacha o‘zgarganligi hamda o‘rtacha yillik foiz stavkalar 25,7 foizdan 25 foizga pasayganligi aniqlandi.
Ma’lumotlar, tijorat banklarining veb saytlaridan olingan bo‘lib kredit shartlari o‘zgarishi mumkin.
Izoh (0)