Rossiya Yadro tadqiqotlari birlashgan instituti O‘zbekistonning uchta oliygohi bilan hamkorlikni yo‘lga qo‘ydi

Fanlar akademiyasida O‘zbekiston ilmiy-ta’lim tashkilotlari va Rossiya Yadro tadqiqotlari birlashgan instituti o‘rtasidagi hamkorlik istiqbollari muhokamasiga bag‘ishlangan davra suhbati bo‘lib o‘tdi, deb xabar qilmoqda “Dunyo” axborot agentligi.

Tadbirda O‘zbekiston Fanlar akademiyasi ilmiy tashkilotlari va yetakchi oliy o‘quv yurtlari vakillari hamda Rossiya Yadro tadqiqotlari birlashgan instituti delegatsiyasi a’zolari ishtirok etdi.

Uchrashuv va muhokamalar yakunida Rossiya Yadro tadqiqotlari birlashgan instituti bilan O‘zbekiston Milliy universiteti, Toshkent Davlat texnika universiteti, Namangan Muhandislik-texnologiya instituti o‘rtasida hamkorlik shartnomalari imzolandi.

Ulardan ko‘zlangan maqsad yuqori malakali ilmiy va muhandis kadrlar tayyorlashga qaratilgan qo‘shma loyihalarni hayotga tatbiq etish, xalqaro ilmiy forumlar uyushtirish va ta’lim dasturlarini amalga oshirish bo‘yicha o‘zaro hamkorlikni yo‘lga qo‘yishdan iboratdir.

Shuningdek, Rossiya Yadro tadqiqotlari birlashgan instituti delegatsiyasining ushbu safari doirasida O‘zbekiston Fanlar akademiyasining Yadro fizikasi institutida bulutli hisoblash klasterining ochilish marosimini o‘tkazish va uning ishga tushirilishi rejalashtirilgan.