Kerch bo‘g‘ozini kesib o‘tgan Qrim ko‘prigida yuz bergan portlashdan keyin avtomobil ko‘prigining bir qismi vayron bo‘lib, bir nechta ustunlar oralig‘i suvga qulagan. Bu haqda mahalliy “Kerch.fm” nashri xabar bermoqda.
Milliy aksilterrorchilik qo‘mitasi ma’lumotlariga ko‘ra, ko‘prikda yuk avtomobili portlatib yuborilgan. Oqibatda poyezdning yettita yonilg‘i sisternasi yonib ketgan.
Qrim parlamenti rahbari Vladimir Konstantinov hodisada “ukrainalik vandallar”ni aybladi.
Rossiya prezidenti Vladimir Putin Qrim ko‘prigidagi favqulodda holat yuzasidan hukumat komissiyasini tuzishni buyurdi.
Shuningdek, ijtimoiy tarmoqlarda Qrim ko‘prigi portlagan lahza aks etgan videolar tarqaldi.
Kerch yarim orolini Taman yarim oroli bilan birlashtiruvchi Qrim ko‘prigi Rossiya va Yevropadagi eng uzun ko‘prik hisoblanadi — uning uzunligi 19 kilometrga teng. Ko‘prik qurilishi 2016-yil fevralida boshlanib, 2019-yil dekabrida to‘liq yakunlangan. Loyiha qiymati 220 milliard rubldan oshgan.
Ko‘prikning avtomobillar uchun mo‘ljallangan qismi 2018-yil mayidayoq ochilgandi. U orqali yo‘lovchi poyezdlar qatnovi esa 2019-yil 23-dekabrdan boshlandi. Muntazam temir yo‘l yuk qatnovi 2020-yil iyulida yo‘lga qo‘yildi.
Izoh (0)