Moskvaning Tver tuman sudi “Xalqaro Memorial” (“Memorial” Xalqaro tarixiy-ma’rifiy, xayriya va huquqni himoya qilish jamiyati”, Rossiya Oliy sudi qarori bilan tugatilgan) Moskvadagi “Memorial” ilmiy-tadqiqot va ma’rifat markaziga o‘z ofisini xayriya qilishiga oid bitimni haqiqiy emas, deb topdi. Bu haqda Meduza xabar bermoqda.
Sud Rossiya Bosh prokuraturasi da’vosi bo‘yicha “Memorial” ofisini davlat daromadiga o‘tkazdi.
“Memorial” avvalroq prokuraturaning talabini binoning siyosiy maqsaddagi reyderlik ishg‘oli deb atagandi.
Eslatib o‘tamiz, 7-oktabr kuni Tinchlik bo‘yicha 2022-yilgi Nobel mukofoti sovrindorlari e’lon qilindi. Mukofotni Rossiyaning “Memorial” huquqni himoya qilish tashkiloti, belaruslik huquq himoyachisi, “Vyasna” huquqni himoya qilish markazi raisi Ales Belyatskiy hamda Ukrainaning “Fuqarolar erkinliklari markazi” tashkiloti o‘zaro bo‘lishib oldi.
“Tinchlik mukofoti sovrindorlari o‘z mamlakatlaridagi fuqarolik jamiyati vakillaridir. Ko‘p yillar mobaynida ular hukumatni tanqid qilish va fuqarolarning asosiy huquqlarini himoya qilish huquqini yoqlab keldi. Ular harbiy jinoyatlar, inson huquqlari buzilishi va hokimiyatning suiiste’mol qilinishini hujjatlashtirish uchun katta kuch sarfladi. Ularning barchasi birgalikda tinchlik va demokratiya uchun fuqarolik jamiyatining ahamiyatini namoyon qiladi”, — deyiladi qo‘mita bayonotida.
2021-yil dekabrida Rossiya Oliy sudi “Xalqaro Memorial”ni, Moskva shahar sudi esa “Memorial” tashkilotini tugatish haqida qaror chiqargandi. Ikkala tashkilot ham sud qarorini shikoyatlari bilan o‘zgartira olmadi.
Izoh (0)